नेकपा एमालेका अध्यक्ष केपी शर्मा ओलीले आफू र आफ्नो पार्टीले यस पटकको निर्वाचनमा अपेक्षा गरेजस्तो मत प्राप्त गर्न नसकेको स्वीकार गरेका छन्।
सामाजिक सञ्जालमार्फत प्रतिक्रिया दिँदै उनले यस पटकको निर्वाचन परिणाम अपेक्षाअनुसार नआएको बताएका हुन्। उनले लेखेका छन्, “यस पटकको निर्वाचनमा मैले अपेक्षा गरेजस्तो परिणाम प्राप्त गर्न सकिनँ। हाम्रो पार्टीले पनि अपेक्षित परिणाम ल्याउन सकेन। लोकतन्त्रमा अन्तिम फैसला जनताकै हुन्छ, र त्यो फैसला शिरोधार्य गर्नु म र मेरो पार्टीको कर्तव्य हो। जनताको मतलाई म पूर्ण सम्मानका साथ स्वीकार गर्दछु।”
ओलीले यस कठिन घडीमा पनि सूर्य चिन्हमा मतदान गरेर आफ्नो पक्षमा उभिने सम्पूर्ण मतदाताप्रति आभार व्यक्त गरेका छन्। उनले मतदाता, नेता, कार्यकर्ता, स्वयंसेवक, शुभेच्छुक र समर्थकप्रति धन्यवाद दिँदै उनीहरूको विश्वास नै पार्टीको शक्ति भएको बताएका छन्।
निर्वाचनको परिणाम आफ्नो पक्षमा नआए पनि जनताप्रतिको प्रतिबद्धता र सेवाभाव कमजोर नभएको उनले उल्लेख गरेका छन्। ओलीले आगामी दिनमा पनि जनतामाझ नै रहेर काम गर्ने बताएका छन्।
उनले भनेका छन्, “हामी जनताकै बीचमा रहनेछौँ, जनताकै लागि काम गरिरहनेछौँ, र विश्वासको यो सम्बन्धलाई अझ बलियो बनाउँदै अघि बढ्नेछौँ। मत दिनुहुने, साथ दिनुहुने, विश्वास राख्नुहुने सबैमा हृदयदेखि धन्यवाद।”
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
