उज्यालो नेपाल पार्टीका अध्यक्ष कुलमान घिसिङले आफ्नो पार्टीले अब सडकबाटै सरकार सञ्चालन गर्ने बताएका छन्। बुधबार काठमाडौंमा आयोजित पार्टीको बागमती प्रदेशस्तरीय अगुवा भेलालाई सम्बोधन गर्दै उनले यस्तो बताएका हुन्।

उनले मुलुकलाई समृद्धिको बाटोमा लैजानका लागि उज्यालो नेपाल पार्टीले सडकबाटै आम जनताको सरकारका रूपमा काम गर्ने उल्लेख गरे। राष्ट्रियता, विद्यमान समस्या समाधान र समृद्धिको दिशामा देशलाई अघि बढाउन आफ्नो पार्टीले सशक्त भूमिका खेल्ने उनको भनाइ थियो।

अध्यक्ष घिसिङले भने, “हामी सडकमा बसेर आम नेपाली जनताको सरकार चलाउने छौँ। सडकको सरकार उज्यालो नेपाल पार्टीको हुनेछ।”

उनले देशलाई सही बाटोमा लैजान सरकारलाई खबरदारी गर्ने काम पनि आफ्नो पार्टीको प्रतिबद्धता रहेको बताए। साथै, उज्यालो नेपाल पार्टी जनताको घरदैलोमा पुग्ने र आगामी प्रदेश तथा स्थानीय तहको निर्वाचनमा सशक्त राजनीतिक शक्तिका रूपमा उदय हुने जिकिर गरे।

अध्यक्ष घिसिङले प्रतिनिधिसभा निर्वाचनमा समय अभावका कारण आफ्नो पार्टीले हार व्यहोर्नुपरेको पनि बताएका छन्।