राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन) नेतृत्वको सरकारले केही मन्त्रालय गाभ्दै कुल मन्त्रालय संख्या १६ मा सीमित गरेको छ।

प्रधानमन्त्री शाहले रक्षा र उद्योग वाणिज्य मन्त्रालय आफैंसँग राखेका छन्। बाँकी १४ जना मन्त्रीहरूले राष्ट्रपतिबाट पद तथा गोपनीयताको शपथ लिएका छन्।

यसअन्तर्गत युवा तथा खेलकुद मन्त्रालयलाई शिक्षा, विज्ञान तथा प्रविधि मन्त्रालयमा गाभिएको छ। सो मन्त्रालयको जिम्मेवारी सस्मित पोखरेलले पाएका छन्।

त्यसैगरी, खानेपानी मन्त्रालयलाई स्वास्थ्य तथा जनसंख्या मन्त्रालयमा समाहित गरिएको छ। यस मन्त्रालयको जिम्मेवारी निशा मेहतालाई दिइएको छ।

सरकारले वन तथा वातावरण मन्त्रालयलाई खारेज गर्दै कृषि मन्त्रालयमा गाभेको छ। यसअन्तर्गतको जिम्मेवारी गीता चौधरीले सम्हालेकी छन्।

त्यस्तै, भूमि व्यवस्था, सहकारी तथा गरिबी निवारण मन्त्रालयलाई संघीय मामिला तथा सामान्य प्रशासन मन्त्रालयमा गाभिएको छ। यसको जिम्मेवारी प्रतिभा रावललाई दिइएको छ।

यस पुनर्संरचनासँगै सरकारले मन्त्रालयको संख्या घटाएर कार्यसम्पादनलाई प्रभावकारी बनाउने लक्ष्य राखेको जनाएको छ।