गृहमन्त्री सुधन गुरुङले आफूमाथि उठेका विभिन्न प्रश्न र आरोपका विषयमा स्पष्टीकरण दिएका छन्। उनले सामाजिक सञ्जाल फेसबुकमार्फत धारणा सार्वजनिक गर्दै अनुसन्धान प्रक्रियामा पूर्ण सहयोग गर्ने बताएका छन्।

विवादित पृष्ठभूमिका एक व्यवसायीसँग आफ्नो नाम जोडिएको विषयमा प्रतिक्रिया दिँदै गुरुङले आरोप र सत्य एउटै कुरा नभएको स्पष्ट पारे। उनले निर्णय भावनाभन्दा प्रमाणका आधारमा हुनुपर्ने बताएका छन्।

गुरुङले आफूले २५ लाख रुपैयाँ बराबरको सेयर लुकाएको भनाइप्रति अस्वीकार जनाउँदै मन्त्रिपरिषद्को वेबसाइटमा सार्वजनिक गरिएको सम्पत्ति विवरणमा दुई करोडभन्दा बढीको लगानी उल्लेख गरिएको बताएका छन्। उनका अनुसार सो लगानी धितोपत्र बजारमा कारोबार हुने सेयरअन्तर्गत पर्दछ।

मन्त्री हुनुअघि नै सेयर खरिद गरिएको उल्लेख गर्दै उनले उक्त लगानीको स्रोत २०८० भदौ २९ गते गरिएको ऋण सम्झौता रहेको बताएका छन्। सबै कारोबार बैंकिङ प्रणालीमार्फत भएको र त्यसको प्रमाण सुरक्षित रहेको उनको भनाइ छ।

विवादित व्यक्ति दीपक भट्टसँग साझेदारी भएको आरोपबारे उनले एउटै कम्पनीमा धेरै सेयरधनी हुने भएकाले सेयर खरिदलाई व्यक्तिगत साझेदारी मान्न नमिल्ने तर्क गरेका छन्।

गुरुङले ‘कन्फ्लिक्ट अफ इन्ट्रेस्ट’ सम्बन्धी विषयमा छानबिन गर्ने निकाय गृह मन्त्रालय नभई अर्थ मन्त्रालयअन्तर्गतको सम्पत्ति शुद्धीकरण विभाग रहेको उल्लेख गर्दै प्रक्रिया अनुसार छानबिन भइरहेको बताए।

लगानी गर्दा सबै जोखिम पहिल्यै थाहा नहुने भन्दै उनले पछिका घटनालाई आधार बनाएर अघिको निर्णयलाई दोष दिनु उचित नभएको बताएका छन्।

उनले कानुनी रूपमा संवेदनशील विषय भएकाले हतारमा प्रतिक्रिया दिन उपयुक्त नहुने उल्लेख गर्दै सत्य प्रमाणका आधारमा मात्र स्थापित हुने बताएका छन्।

अन्त्यमा, गृहमन्त्री गुरुङले पार्टीले गर्ने निर्णयको पूर्ण पालना गर्ने र अनुसन्धानमा आवश्यक सहयोग गर्न आफू तयार रहेको पुनः दोहोर्‍याएका छन्। साथै, सार्वजनिक बहसमा तथ्य र प्रमाणका आधारमा उभिन आग्रह गरेका छन्।