उज्यालो नेपाल पार्टीका अध्यक्ष कुलमान घिसिङले इन्धनमा गरिएको मूल्यवृद्धि फिर्ता गर्न सरकारसँग माग गरेका छन्।

सोमबार सुर्खेतको वीरेन्द्रनगरमा आयोजित पत्रकार सम्मेलनमा बोल्दै घिसिङले मूल्यवृद्धि तत्काल फिर्ता लिनुपर्ने बताएका हुन्।

कर्णाली प्रदेशस्तरीय प्रथम अगुवा कार्यकर्ता भेलामा सहभागी हुन सुर्खेत पुगेका उनले विशेष सहुलियतसहित मूल्यवृद्धि घटाउने निर्णय लिनुपर्नेमा जोड दिए।

छिमेकी भारतमा इन्धनको मूल्य नबढाइएको उदाहरण दिँदै उनले नेपालमा पनि मूल्य नबढाउने विकल्पबारे सोच्न सरकारलाई सुझाव दिएका छन्। उनले नागरिकमाथि मूल्यवृद्धिको भार नथप्न सरकारलाई आग्रह गरेका छन्।

अर्को प्रसंगमा उनले बालेन्द्र शाह नेतृत्वको सरकारलाई काम गर्न अवसर दिनुपर्ने धारणा व्यक्त गरे। साथै, आफूहरूले सरकारलाई आवश्यक सहयोग गर्ने प्रतिबद्धता पनि जनाए।

घिसिङले अघिल्लो निर्वाचनमा हतारमा चुनावमा जानुपरेकाले पार्टीले अपेक्षित सफलता हासिल गर्न नसकेको उल्लेख गर्दै आगामी निर्वाचनमा उज्यालो नेपाल पार्टी ठूलो शक्तिका रूपमा स्थापित हुने दाबी गरेका छन्।