निर्वाचन आयोगले प्रतिनिधिसभा सदस्य निर्वाचन–२०८२ को निर्वाचन खर्च सार्वजनिक गरेको छ।

आयोगले आइतबार प्रेस विज्ञप्ति जारी गर्दै गत फागुन २१ गते सम्पन्न प्रतिनिधिसभा निर्वाचन सञ्चालनका क्रममा भएको खर्च तथा वित्तीय व्यवस्थापनसम्बन्धी विवरण सार्वजनिक गरेको हो।

आयोगका अनुसार निर्वाचन सञ्चालनका लागि नेपाल सरकारबाट कुल ६ अर्ब ७१ करोड ९२ लाख ८७ हजार २ सय रुपैयाँ प्राप्त भएको थियो।

उक्त रकममध्ये ४ अर्ब ९६ करोड ७८ लाख ३९ हजार ४५ रुपैयाँ खर्च भएको आयोगले जनाएको छ।

निर्वाचन आयोगले कुल मतदाता संख्या १ करोड ८९ लाख ३ हजार ६ सय ८९ लाई आधार मानेर हिसाब गर्दा प्रति मतदाता औसत २ सय ६३ रुपैयाँ खर्च भएको उल्लेख गरेको छ।

आयोगले निर्वाचन सम्पन्न गर्न सुरक्षा व्यवस्थापन, कर्मचारी परिचालन, मतदान सामग्री, ढुवानी तथा अन्य प्रशासनिक शीर्षकमा खर्च भएको जनाएको छ।