चालू आर्थिक वर्ष २०८२/८३ को पहिलो दश महिनामा नेपालको वैदेशिक व्यापार १९ खर्ब रुपैयाँभन्दा माथि पुगेको छ।

भन्सार विभागका अनुसार साउनदेखि वैशाखसम्म कुल १९ खर्ब ४१ अर्ब ६० करोड रुपैयाँ बराबरको वैदेशिक व्यापार भएको छ। यो गत आर्थिक वर्षको सोही अवधिको तुलनामा १४.९२ प्रतिशतले बढी हो। अघिल्लो वर्ष यही अवधिमा १६ खर्ब ९२ अर्ब ९ करोड रुपैयाँ बराबरको व्यापार भएको थियो।

यस अवधिमा नेपालले १४ खर्ब ४३ अर्ब ६७ करोड रुपैयाँ बराबरको व्यापार घाटा व्यहोरेको छ। गत वर्षको यही अवधिमा व्यापार घाटा १२ खर्ब ५६ अर्ब २७ करोड रुपैयाँ रहेको थियो।

विभागका अनुसार चालू आवको दश महिनामा १६ खर्ब ९२ अर्ब ६४ करोड रुपैयाँ बराबरको वस्तु आयात भएको छ। यो अघिल्लो वर्षको तुलनामा १४.८२ प्रतिशतले बढी हो। गत वर्ष सोही अवधिमा १४ खर्ब ७४ अर्ब १८ करोड रुपैयाँ बराबरको आयात भएको थियो।

यता, निर्याततर्फ भने नेपालबाट दुई खर्ब ४८ अर्ब ९६ करोड रुपैयाँ बराबरको वस्तु तथा सेवा विदेश पठाइएको छ। निर्यात पनि अघिल्लो वर्षको तुलनामा १४.२५ प्रतिशतले बढेको भए पनि आयातको तुलनामा निकै कम रहेको देखिएको छ। गत वर्ष यही अवधिमा दुई खर्ब १७ अर्ब ९१ करोड रुपैयाँ बराबरको निर्यात भएको थियो।

आयात र निर्यातबीचको ठूलो अन्तरका कारण नेपालको व्यापार घाटा लगातार बढ्दै गएको देखिएको छ। आर्थिक गतिविधि बढेसँगै आयात उच्च दरमा बढे पनि उत्पादन र निर्यात विस्तार अपेक्षाअनुसार हुन नसक्दा व्यापार असन्तुलन झन् गहिरिँदै गएको छ।