प्रधानमन्त्री बालेन्द्र शाह (बालेन) सम्भवत: एक हप्ताभित्रै प्रतिनिधिसभामा उपस्थित हुने संकेत गरिएको छ। सत्तारुढ दल राष्ट्रिय स्वतन्त्र पार्टी (रास्वपा) ले प्रधानमन्त्री छिट्टै सदनमा आउने दाबी गरेको हो।

मंगलबारको प्रतिनिधिसभा बैठकमा रास्वपा महामन्त्री कवीन्द्र बुर्लाकोटीले प्रधानमन्त्रीको संसद् उपस्थितिबारे जानकारी दिएका हुन्।

उनका अनुसार पहिलो बैठक स्थगित भएपछि विभिन्न दलसँग संवाद भएको र त्यसक्रममा प्रधानमन्त्रीको सचिवालयसँग पनि छलफल गरिएको थियो।

संसद्मा बोल्दै उनले भने, “प्रधानमन्त्रीको सचिवालयसँग पनि कुरा गरेँ, प्रधानमन्त्रीज्यू सदनमा आउनुहुन्छ। सम्भवत: एक हप्ताभित्रै सदनमा आउने जानकारी गराउँदछु।”

प्रधानमन्त्रीको संसद् उपस्थिति र प्रश्नोत्तरलाई लिएर पछिल्ला दिनमा राजनीतिक दलहरूबीच बहस चलिरहेको छ। यसैबीच रास्वपाले प्रधानमन्त्री छिट्टै संसद्मा आउने बताएको हो।