सरकारले निजी अस्पतालमा दिइँदै आएका स्वास्थ्य बीमासम्बन्धी नियमित सेवा बन्द गर्ने निर्णय गरेको छ। स्वास्थ्य बीमा बोर्डले बढ्दो वित्तीय संकटलाई कारण देखाउँदै आकस्मिक बाहेकका सबै बीमा सेवा स्थगित गर्ने निर्णय गरेको हो।
बोर्डले सार्वजनिक गरेको सूचनाअनुसार आगामी जेठ १६ गतेदेखि अर्को निर्णय नभएसम्म निजी स्वास्थ्य संस्थाबाट प्रदान हुँदै आएका स्वास्थ्य बीमाका सेवा बन्द रहनेछन्।
यो निर्णय जेठ ११ गते बसेको स्वास्थ्य बीमा बोर्डको बैठकले गरेको बताइएको छ।
निर्णयसँगै देशभर स्वास्थ्य बीमा कार्यक्रममा आबद्ध रहेका सयौं निजी अस्पताल र मेडिकल कलेजबाट सेवाग्राहीले पाउँदै आएका ओपीडी, प्रयोगशाला परीक्षण, शल्यक्रिया, औषधि वितरण तथा अन्य नियमित उपचार सेवा प्रभावित हुने भएका छन्।
यद्यपि आकस्मिक सेवा भने यथावत् सञ्चालन हुने बोर्डले जनाएको छ।
स्वास्थ्य बीमा बोर्डका अनुसार हालसम्म सेवाप्रदायक संस्थालाई करिब १६ अर्ब रुपैयाँ भुक्तानी गर्न बाँकी रहेको छ। लामो समयदेखि निजी अस्पतालहरूले स्वास्थ्य बीमावापतको रकम सरकारले समयमै नदिएको, दाबी रकम रोकिएको तथा प्रक्रियागत झन्झट बढेको गुनासो गर्दै आएका थिए।
बीमा कार्यक्रम अन्तर्गत सेवा कटौती भएपछि हजारौं बीमित नागरिक प्रत्यक्ष प्रभावित हुने देखिएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
