गणतन्त्र दिवसका अवसरमा काठमाडौंको खुलामञ्चमा आयोजित विशेष समारोहमा यस वर्ष कुनै पनि पूर्वप्रधानमन्त्री सहभागी भएनन् । राष्ट्रपति रामचन्द्र पौडेलले सम्बोधन गरेको कार्यक्रममा प्रधानमन्त्री बालेन्द्र शाहको उपस्थिति रहे पनि पूर्वप्रधानमन्त्रीहरू भने अनुपस्थित देखिए ।
हरेक वर्ष जेठ १५ मा मनाइने गणतन्त्र दिवस समारोहमा पूर्वप्रधानमन्त्रीहरूलाई निमन्त्रणा गर्ने परम्परा रहँदै आएको छ । कार्यक्रम व्यवस्थापन प्रधानमन्त्री तथा मन्त्रिपरिषद्को कार्यालय र गृह मन्त्रालयको समन्वयमा हुने गर्छ ।
गृह मन्त्रालयका उपसचिव सन्तोष पौडेलले यस वर्ष पनि प्रोटोकलअनुसार सबै पूर्वप्रधानमन्त्रीलाई निमन्त्रणा पठाइएको दाबी गरेका छन् ।
उनले भने, “हरेक वर्षजस्तै यसपटक पनि सबै पूर्वप्रधानमन्त्रीज्यूहरूलाई निमन्त्रणा गरिएको हो, कसैलाई छुटाइएको छैन । तर समारोहमा उहाँहरूको उपस्थिति भएन ।”
अघिल्ला वर्षहरूमा नियमित रूपमा सहभागी हुने गरेका पूर्वप्रधानमन्त्री डा. बाबुराम भट्टराईसमेत यसपटक समारोहमा देखिएनन् । पूर्वप्रधानमन्त्री केपी शर्मा ओली, पुष्पकमल दाहाल ‘प्रचण्ड’, माधवकुमार नेपाल र झलनाथ खनाल पनि कार्यक्रममा अनुपस्थित रहे । नेपाली कांग्रेसका सभापति तथा पूर्वप्रधानमन्त्री शेरबहादुर देउवा भने विदेश भ्रमणमा रहेका छन् ।
पूर्वप्रधानमन्त्री ओलीको सचिवालयले भने सरकारले औपचारिक निमन्त्रणा नपठाएको दाबी गरेको छ ।
पूर्वप्रधानमन्त्री प्रचण्डलाई ‘पूर्वप्रधानमन्त्री’को हैसियतमा नभई प्रतिनिधिसभा सदस्यको रूपमा निमन्त्रणा पठाइएको बुझिएको छ ।
प्रचण्डलाई पूर्वप्रधानमन्त्रीको हैसियतमा निम्ता आउने अपेक्षा गरिएको थियो तर पछि सांसदको रूपमा पठाइएको निमन्त्रणा पिजनहोलमा राखिएको भेटिएको बताइएको छ ।
यस वर्षको गणतन्त्र दिवस समारोहमा पूर्वप्रधानमन्त्रीहरूको सामूहिक अनुपस्थितिलाई राजनीतिक वृत्तमा अर्थपूर्ण रूपमा हेरिएको छ । निमन्त्रणाको विषय, प्रोटोकल र राजनीतिक असन्तुष्टिलाई लिएर विभिन्न टिप्पणीसमेत सुरु भएका छन् ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
