राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानेन्द्र शाहीले दरबार हत्याकाण्डबारे निष्पक्ष र विश्वसनीय छानबिन गर्न माग गरेका छन्। उनले तत्कालीन गृहमन्त्री तथा वर्तमान राष्ट्रपति रामचन्द्र पौडेलसँग पनि आवश्यक बयान र जानकारी लिन सम्बन्धित निकायलाई सुझाव दिएका छन्।
सोमबार सामाजिक सञ्जालमार्फत आफ्नो धारणा सार्वजनिक गर्दै शाहीले पूर्वराजपरिवारप्रति श्रद्धाञ्जली अर्पण गरेका छन्। उनले दरबार हत्याकाण्डबारे आजसम्म पनि धेरै नेपाली नागरिकका मनमा विभिन्न प्रश्न जीवित रहेको उल्लेख गरेका छन्।
शाहीले राजपरिवारले नै न्याय नपाएको देशमा सर्वसाधारण नागरिकले न्याय पाउने विषयमा समेत प्रश्न उठाएका छन्। उनले घटनाको सत्यतथ्य बाहिर ल्याउन स्वतन्त्र, पारदर्शी र विश्वसनीय छानबिन आवश्यक रहेको बताएका छन्।
उनले दरबार हत्याकाण्ड भएको समयमा देशको गृहमन्त्री रहेका व्यक्ति हाल राष्ट्रपतिको जिम्मेवारीमा रहेको उल्लेख गर्दै त्यसबेलाको परिस्थितिबारे उहाँसँग महत्वपूर्ण जानकारी, अनुभव वा दृष्टिकोण हुन सक्ने बताएका छन्।
सामाजिक सञ्जालमा सार्वजनिक गरेको सन्देशमा शाहीले सरकारलाई सम्बोधन गर्दै सत्यतथ्य पत्ता लगाउने उद्देश्यले राष्ट्रपति पौडेलसँग आवश्यक बयान लिने, जानकारी माग्ने वा छानबिन प्रक्रियामा सहयोगका लागि आग्रह गर्ने विषयमा सम्बन्धित निकायले विचार गर्नुपर्ने बताएका छन्।
शाहीले दरबार हत्याकाण्डको विषयमा अझै पनि धेरै जिज्ञासा र प्रश्न बाँकी रहेको उल्लेख गर्दै घटनाको वास्तविकता सार्वजनिक गर्न राज्यले गम्भीर पहल गर्नुपर्ने धारणा राखेका छन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
