राष्ट्रिय स्वतन्त्र पार्टी (रास्वपा) का सभापति रवि लामिछाने भारतको सत्तारुढ भारतीय जनता पार्टी (भाजपा) को नयाँ दिल्लीस्थित केन्द्रीय कार्यालय पुगेका छन्। त्यहाँ उनको भव्य स्वागत गरिएको छ।

भाजपा मुख्यालय पुग्दा लामिछानेलाई पुष्पवृष्टिसहित स्वागत गरिएको थियो। भाजपा अध्यक्ष नितिन नविनले उनलाई फूलको गुच्छा प्रदान गर्दै स्वागत गरेका हुन्।

भ्रमणका क्रममा लामिछाने र नविनबीच भेटवार्ता हुने कार्यक्रम तय गरिएको छ। दुवै नेताबीच समसामयिक राजनीतिक तथा आपसी चासोका विषयमा छलफल हुने जनाइएको छ।

भाजपा कार्यालयमा लामिछानेको स्वागतका लागि बाजागाजा बजाइएको थियो भने सांस्कृतिक कार्यक्रमसमेत आयोजना गरिएको थियो। नर्तकीहरूले सांस्कृतिक नृत्य प्रस्तुत गर्दै अतिथिको स्वागत गरेका थिए।

कार्यक्रममा भारतमा रहेका नेपाली समुदायका सदस्यहरूको पनि उपस्थिति रहेको थियो। उनीहरूले लामिछानेलाई खादा ओढाएर सम्मान व्यक्त गरेका थिए।

पाँचदिने भारत भ्रमणमा रहेका लामिछाने भाजपा अध्यक्ष नितिन नविनको निमन्त्रणामा नयाँ दिल्ली पुगेका हुन्। भ्रमणका क्रममा उनले विभिन्न राजनीतिक तथा कूटनीतिक भेटघाट गर्ने कार्यक्रम रहेको बताइएको छ।