बागमती प्रदेशअन्तर्गत समस्याग्रस्त सहकारी व्यवस्थापन समितिले समस्याग्रस्त पाँच सहकारी संस्थाका ठूला ऋणीहरूको नामावली सार्वजनिक गरेको छ।
समितिको शुक्रबार बसेको बैठकले लालीगुराँस सेभिङ एण्ड क्रेडिट को–अपरेटिभ लिमिटेड, सुमेरु सेभिङ एण्ड क्रेडिट को–अपरेटिभ लिमिटेड, नेशनल नमोबुद्ध बचत तथा ऋण सहकारी संस्था लिमिटेड, दर्शन बचत तथा ऋण सहकारी संस्था लिमिटेड तथा सिभिल सेभिङ एण्ड क्रेडिट को–अपरेटिभ लिमिटेडका कुल ११४ जना ठूला ऋणीको नाम सार्वजनिक गर्ने निर्णय गरेको हो।
समितिका अनुसार लालीगुराँस सहकारीका १३ जना, सुमेरु सहकारीका ३१ जना, नेशनल नमोबुद्धका ११ जना, दर्शन सहकारीका ५४ जना तथा सिभिल सहकारीका ५ जना ऋणीको नामावली सार्वजनिक गरिएको छ।
समिति सदस्य रामेश्वर ढकालका अनुसार समितिमा उपलब्ध ऋण विवरण तथा अभिलेखका आधारमा सम्बन्धित ऋणीहरूको नाम सार्वजनिक गरिएको हो।
समितिले सार्वजनिक गरिएका ऋणीहरूलाई सम्बन्धित सहकारी संस्थाबाट लिएको ऋण यथाशीघ्र चुक्ता गर्न आग्रह गरेको छ। बचतकर्ताको रकम फिर्ता तथा सहकारीको दायित्व व्यवस्थापनलाई सहज बनाउन ऋण असुली प्रक्रियालाई प्राथमिकता दिइएको समितिले जनाएको छ।
समस्याग्रस्त घोषित सहकारी संस्थाहरूको वित्तीय व्यवस्थापन सुधार तथा बचतकर्ताको हित संरक्षणका लागि समितिले आवश्यक प्रक्रिया अघि बढाइरहेको जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
