देशका विभिन्न भागमा आज बिहानैदेखि वर्षा भइरहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार हाल पश्चिमी वायु, अरब सागरको न्यून चापीय प्रणाली र बङ्गालको खाडीमा विकसित चक्रवात ‘मोन्था’ को संयुक्त प्रभाव देशभर देखिएको छ।
महाशाखाले जनाएको अनुसार आज बिहान देशभर सामान्यतया बदली रहेको छ। कोशी, मधेस, बागमती र गण्डकी प्रदेशका थोरै स्थानहरूमा मध्यम वर्षा र हिमपात भइरहेको छ भने अन्य प्रदेशका केही स्थानमा हल्का वर्षा र हिमपातको घटना देखिएको छ।
दिउँसो कोशी, मधेस, बागमती, गण्डकी र लुम्बिनी प्रदेशका धेरै स्थानमा आकाश पूर्ण रूपमा बादल हुने र मध्यम वर्षा हुने सम्भावना छ। तराईका अधिकांश भूभागमा सामान्य बदली रहने अनुमान गरिएको छ।
महाशाखाका अनुसार कर्णाली र सुदूरपश्चिम प्रदेशका केही स्थानमा पनि हल्का वर्षा हुन सक्नेछ। साथै देशका उच्च पहाडी र हिमाली भूभागका केही स्थानमा मध्यमदेखि भारी हिमपातको सम्भावना रहेको छ।
राति पनि अधिकांश प्रदेशमा बदली रहने र वर्षा जारी रहने अनुमान गरिएको छ। कोशी, मधेस, बागमती र लुम्बिनी प्रदेशका केही स्थानमा भारी वर्षा र हिमपात हुन सक्ने चेतावनी महाशाखाले दिएको छ।
महाशाखाले यात्रुहरूलाई सावधानी अपनाउन र हिमाली क्षेत्रमा पर्ने हिमपातका कारण आवागमनमा कठिनाइ हुन सक्ने भएकाले आवश्यक तयारी गर्न आग्रह गरेको छ।
