सरकारले बजेटमा करका दर हेरफेर गरेको विवादमा मुछिएका अर्थमन्त्री स्वर्णिम वाग्लेमाथि तत्काल छानबिन गर्नुपर्ने अवस्था नरहेको स्पष्ट पारेको छ।

शुक्रबार बसेको मन्त्रिपरिषद् बैठकपछि सञ्चारकर्मीसँग कुरा गर्दै सरकारका प्रवक्ता सस्मित पोखरेलले अर्थमन्त्री वाग्लेको स्पष्टीकरण नै पर्याप्त रहेको बताएका हुन्।

प्रवक्ता पोखरेलका अनुसार अर्थमन्त्रीले आफ्नो विषयमा उठेका प्रश्नको जवाफ संसद र सम्बन्धित संसदीय समितिमा पहिले नै दिइसकेकाले थप छानबिनको आवश्यकता नदेखिएको सरकारको निष्कर्ष छ।

मन्त्रिपरिषद् बैठकपछि बोल्दै उनले भने, “अर्थमन्त्रीज्यूले सदन र समितिमा यसबारे प्रस्ट पारिसक्नुभएको छ। हाललाई योभन्दा बाहेक थप केही गर्नुपर्ने आवश्यकता सरकारले महसुस गरेको छैन।”

बजेट प्रस्तुत भएपछि करका दरमा भएको भनिएको हेरफेरलाई लिएर विपक्षी दल तथा केही सांसदहरूले प्रश्न उठाउँदै आएका थिए। तर सरकारले भने उक्त विषयमा अर्थमन्त्रीले स्पष्टता दिइसकेको भन्दै विवादलाई औपचारिक रूपमा टुंग्याउने संकेत गरेको छ।