अर्थमन्त्री स्वर्णिम वाग्लेले संसदमा सांसदहरूले उठाएका प्रश्नको जवाफ दिँदै बजेट पुनर्लेखन आगामी वर्ष मात्र हुने बताएका छन्।

शुक्रबार प्रतिनिधिसभामा विनियोजन विधेयकमाथिको छलफलमा उठेका प्रश्नहरूको जवाफ दिने क्रममा उनले सांसदहरूको टिप्पणीप्रति व्यंग्यात्मक शैलीमा प्रतिक्रिया दिएका हुन्।

एमाले सांसद राजेन्द्र राईले बजेट पुनर्लेखन गर्नुपर्ने माग राखेपछि अर्थमन्त्री वाग्लेले प्रत्यक्ष रूपमा जवाफ दिँदै भने, “बजेटको पुनर्लेखन हुन्छ, अर्को वर्ष।”

उनले सांसदहरूले विनियोजन विधेयकको सामग्री राम्रोसँग अध्ययन नगरेको जस्तो देखिएको टिप्पणीसमेत गरे।

अर्थमन्त्री वाग्लेले भने, “विनियोजन विधेयकको पातलो पुस्तिका छ। माननीयज्यूहरूले धेरैले पाउनुभएन जस्तो बुझें मैले। पाउनुभएको भए पनि त्यसको सेरोफेरोमा रहेर टिप्पणी गर्नुभन्दा समग्र बजेटको विनियोजन सुनेको भरमा धेरै कुरा गर्नुभयो कि जस्तो लाग्यो।”

उनका अनुसार विधेयकलाई राम्रोसँग अध्ययन गरेर छलफल भएको भए बहस अझ बढी केन्द्रित र परिणाममुखी हुन सक्थ्यो।