श्रम संस्कृति पार्टीका अध्यक्ष तथा सांसद हर्कराज राई (हर्क साम्पाङ) ले प्रहरीको पछिल्लो कार्यशैलीप्रति आपत्ति जनाउँदै सरकारको ध्यानाकर्षण गराएका छन् ।

सोमबार प्रतिनिधिसभा बैठकको विशेष समयमा बोल्दै सांसद राईले राष्ट्रिय स्वाभिमान र नागरिक सुरक्षासम्बन्धी विषय उठाएका हुन् । उनले प्रधानमन्त्री वालेन्द्र शाह ‘बालेन’ ले संसद्मा दिएको विवादित अभिव्यक्ति संसद्को अभिलेखबाट हटाउन सभामुखको ध्यानाकर्षण गराए ।

प्रधानमन्त्रीले आफ्नो अभिव्यक्ति सच्याउनुपर्ने माग अझै कायम रहेको उल्लेख गर्दै उनले उक्त अभिव्यक्ति अभिलेखबाट हटाउने निर्णयको प्रतीक्षा गरिरहेको बताए ।

सांसद राईले सुस्ता क्षेत्रमा भारतीय सशस्त्र सीमा बल (एसएसबी) बाट भएको भनिएको अतिक्रमण र नेपाली नागरिकमाथि भएको धाकधम्कीको विरोधमा उत्रिएका युवामाथि भएको कारबाहीप्रति पनि असन्तुष्टि जनाए ।

उनले माइतीघर मण्डलामा शान्तिपूर्ण प्रदर्शनमा सहभागी अजय सोदारी र बिरजन विकलाई नियन्त्रणमा लिएर झुट्टा मुद्दा लगाउने प्रयास भएको आरोप लगाउँदै गृहमन्त्रीको ध्यानाकर्षण गराए । देशभक्त युवाहरूलाई दुःख नदिन र तत्काल रिहा गर्न उनले माग गरे ।

प्रहरीको कार्यशैलीमाथि प्रश्न उठाउँदै सांसद राईले विद्यार्थीहरूको मोबाइल खोसेर नष्ट गरिएको तथा एक विपन्न टेम्पो चालकको सवारीसाधन भीरबाट खसालिएको घटनाको आलोचना गरे । उनले पीडित चालकलाई क्षतिपूर्ति उपलब्ध गराउन पनि माग गरे ।

सुरक्षाकर्मीबाटै सर्वसाधारणको घरको छानामा ढुंगा प्रहारजस्ता गतिविधि भइरहेको उल्लेख गर्दै उनले प्रहरीको उपस्थितिमा नागरिकले सुरक्षाको सट्टा त्रास महसुस गर्नु लोकतन्त्रका लागि गम्भीर विषय भएको बताए ।

प्रहरी देख्दा नागरिकले सुरक्षा, विश्वास र शान्तिको अनुभूति गर्ने वातावरण बनाउन तथा लोकतन्त्रको प्रत्याभूति सुनिश्चित गर्न सांसद राईले सरकारसँग माग गरेका छन् ।