सभामुख डीपी अर्यालले सिंहदरबारमा निर्माणाधीन संसद् हलको स्थलगत निरीक्षण गर्दै निर्माण कार्यमा भएको ढिलाइप्रति असन्तुष्टि व्यक्त गरेका छन्।
सोमबार संसद् सचिवालयका कर्मचारीसहित निर्माणाधीन संसद् भवनको निरीक्षणमा पुगेका सभामुख अर्यालले काम सम्पन्न हुने यकिन मिति तत्काल दिन सम्बन्धित पक्षलाई निर्देशन दिएका हुन्।
गत जेठ १५ गते यही हलबाट बजेट सार्वजनिक गर्ने तयारी रहे पनि भवन निर्माण कार्य अझै सम्पन्न नभएको भन्दै उनले गम्भीर चासो व्यक्त गरे। निर्धारित समयमै काम नसकिए दैनिक एक करोड रुपैयाँसम्म जरिवाना तिराउन सकिने चेतावनी समेत उनले दिएका छन्।
निरीक्षणका क्रममा सभामुख अर्यालले सहरी विकास मन्त्री र मन्त्रालयका सचिवलाई तत्काल समन्वय गरी निर्माण कार्य छिटो सम्पन्न गर्न निर्देशन दिएका थिए।
निर्माणमा भइरहेको ढिलाइप्रति असन्तुष्टि जनाउँदै उनले भने, “रातदिन काम गरेर भए पनि बोलेको कुरा पूरा गर्नुपर्छ। बहाना बनाइरहनुहुन्छ। तपाईंहरूले हामीलाई नटेरेको होला, तर यो राष्ट्रकै अपमान हो। अब मलाई स्पष्ट निष्कर्ष चाहियो।”
सभामुख अर्यालले निर्माण कम्पनी तथा सम्बन्धित निकायलाई काम सम्पन्न हुने निश्चित समयसीमा सार्वजनिक गर्न र सोहीअनुसार काम अघि बढाउन आग्रह गरेका छन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
