नेपाली कम्युनिस्ट पार्टी (नेकपा) का सांसद गोपाल शर्माले प्रधानमन्त्री र मन्त्रीहरू स्वयं गैरजिम्मेवार तथा अराजक अभिव्यक्ति दिन प्रतिस्पर्धामा उत्रिएको आरोप लगाएका छन्।
बुधबार प्रतिनिधिसभा बैठकमा बोल्दै सांसद शर्माले पछिल्लो समय सरकारका उच्च पदाधिकारीहरूबाट आउने अभिव्यक्तिले राजनीतिक संस्कारमाथि प्रश्न उठाएको बताए।
उनले प्रधानमन्त्रीदेखि मन्त्रीहरूसम्म विवादास्पद अभिव्यक्ति दिन होडबाजी नै चलेको जस्तो देखिएको टिप्पणी गरे। अर्थमन्त्रीले संसद्को रोष्ट्रमबाट सांसदहरूलाई धम्कीपूर्ण शैलीमा ‘तिम्रा देखाइदिन्छु’ भन्ने अभिव्यक्ति दिएको र भौतिक पूर्वाधार तथा यातायातमन्त्रीले ‘खुट्टा भाँच्ने’ जस्ता शब्द प्रयोग गरेको उनले उल्लेख गरे।
सांसद शर्माले सरकार कानुन कार्यान्वयन गराउने निकाय मात्र नभई स्वयं कानुनप्रति उत्तरदायी हुनुपर्ने बताए।
‘संसद्प्रति जवाफदेही हुने कुरा मात्र होइन, कानुनको परिपालना गर्ने कुरामा सरकार नै गैरजिम्मेवार भएपछि देश कसरी चल्छ ?’ भन्दै उनले प्रश्न उठाए।
उनले वर्तमान अवस्थामा दण्डहीनताले प्रश्रय पाइरहेको दाबी गर्दै वनरक्षकलाई थुनेर मात्रै समस्या समाधान नहुने बताए।
‘यदि कुनै सामान्य नागरिकले कसैलाई खुट्टा भाँच्ने धम्की दिएको भए सरकारले के गर्थ्यो ?’ भन्दै उनले गृहमन्त्रीसँग स्पष्ट जवाफ माग गरे।
मन्त्रीहरूका विवादित अभिव्यक्तिका कारण देशभर गलत सन्देश गएको दाबी गर्दै सांसद शर्माले सरकारलाई संसद्प्रति जवाफदेही बन्न र भएका कमजोरी सच्याउन आग्रह गरे।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
