फिफा विश्वकप फुटबल २०२६ अन्तर्गत आज भएको खेलमा इंग्ल्याण्डले क्रोएसियालाई ४–२ गोल अन्तरले पराजित गरेको छ।
अमेरिकाको डालास रंगशालामा सम्पन्न खेलमा इंग्ल्याण्डले आक्रामक प्रदर्शन गर्दै महत्वपूर्ण तीन अंक हात पारेको हो।
खेलको १२औँ मिनेटमा ह्यारी केनले पेनाल्टीमार्फत गोल गर्दै इंग्ल्याण्डलाई सुरुआती अग्रता दिलाएका थिए। तर ३६औँ मिनेटमा क्रोएसियाका मार्टिन बुटुरिनाले गोल फर्काउँदै खेल १–१ को बराबरीमा ल्याए।
त्यसपछि ४२औँ मिनेटमा केनले व्यक्तिगत दोस्रो गोल गर्दै इंग्ल्याण्डलाई पुनः अग्रता दिलाए। पहिलो हाफको अतिरिक्त समयमा क्रोएसियाका पिटर मुसाले गोल गरेपछि पहिलो हाफ २–२ को बराबरीमा सकिएको थियो।
दोस्रो हाफ सुरु भएको दुई मिनेटमै जुड बेलिङ्हमले गोल गर्दै इंग्ल्याण्डलाई ३–२ को अग्रता दिलाए। त्यसपछि खेलको ८५औँ मिनेटमा मार्कस र्यासफोडले अर्को गोल थपेपछि इंग्ल्याण्डले जित सुनिश्चित गर्यो।
बाँकी समयमा थप गोल हुन नसकेपछि खेल ४–२ को नतिजासहित इंग्ल्याण्डको पक्षमा समाप्त भयो।
प्रतियोगिताअन्तर्गत हाल घाना र पानामाबीच प्रतिस्पर्धा भइरहेको छ। यस्तै आज बिहान ७ः४५ बजे उज्बेकिस्तान र कोलम्बियाबीच खेल हुने तालिका रहेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
