तीन दिनभित्र सम्पन्न गर्ने लक्ष्य राखिएको राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशन शुक्रबार छैटौं दिनमा प्रवेश गरेको छ। पार्टीले आज पदाधिकारी चयनको प्रक्रिया टुंग्याएर महाधिवेशन सम्पन्न गर्ने तयारी गरेको छ।
रास्वपाको पहिलो महाधिवेशन असार ७ गते चितवनमा उद्घाटन भएको थियो। सुरुमा असार ९ गतेसम्म महाधिवेशन सक्ने कार्यतालिका भए पनि प्रतिनिधि चयनमा देखिएको विवाद, केन्द्रीय सदस्य र पदाधिकारी चयन प्रक्रिया लम्बिँदा महाधिवेशन अपेक्षाभन्दा धेरै समयसम्म तानिएको हो।
महाधिवेशन लम्बिँदै जाँदा व्यवस्थापनमा समेत दबाब बढेको छ। अतिरिक्त खर्च व्यवस्थापन गर्न कठिन भएपछि शुक्रबार प्रतिनिधिहरूका लागि खाना नखुवाउने निर्णय गरिएको छ। व्यवस्थापन समितिले बिहीबार राति नै बिहानको चियाको मात्रै व्यवस्था हुने जानकारी दिएको थियो।
यसअघि पार्टी सभापति पदमा रवि लामिछाने निर्विरोध निर्वाचित भइसकेका छन्। तर उपसभापति, महामन्त्री, सहमहामन्त्रीलगायत पदाधिकारीका उम्मेदवारहरूको अन्तिम नामावली भने अझै सार्वजनिक भएको छैन।
बिहीबार केही असन्तुष्टिका बीच केन्द्रीय सदस्यहरूको निर्वाचन परिणाम सार्वजनिक गरिएको थियो। रास्वपाको विधानअनुसार पहिले सभापति र केन्द्रीय सदस्य चयन गर्ने तथा त्यसपछि पदाधिकारी चयन गर्ने व्यवस्था छ।
महाधिवेशन लगातार लम्बिँदा धेरै प्रतिनिधि घर फर्किन थालेपछि पार्टी नेतृत्वले पदाधिकारीहरूलाई सर्वसम्मत रूपमा चयन गरी शुक्रबार नै महाधिवेशन समापन गर्ने तयारी गरेको जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
