देशभर मनसुनी वायुको प्रभाव कायम रहेकाले आज तीन प्रदेशमा भारी वर्षाको सम्भावना रहेको छ भने पश्चिमका पाँच जिल्लामा बाढीको मध्यम जोखिम देखिएको छ।

मौसम पूर्वानुमान महाशाखाका अनुसार बिहीबार बिहान गण्डकी, लुम्बिनी, कर्णाली र सुदूरपश्चिम प्रदेशका अधिकांश स्थानमा बदली रहेको छ। कोसी र बागमती प्रदेशमा सामान्य बदली तथा मधेस प्रदेशमा आंशिक बदली छ। बागमती र गण्डकीका पहाडी क्षेत्रका थोरै स्थान तथा लुम्बिनी र सुदूरपश्चिमका केही स्थानमा मेघगर्जन र चट्याङसहित मध्यम वर्षा भइरहेको छ।

महाशाखाले आज दिउँसो देशका हिमाली र पहाडी भूभागका केही स्थानमा मेघगर्जन तथा चट्याङसहित मध्यम वर्षा वा हिमपात हुने सम्भावना जनाएको छ। सुदूरपश्चिम प्रदेशको तराईका केही स्थान, लुम्बिनी प्रदेशको तराईका थोरै स्थान तथा मधेस, कोसी, बागमती र गण्डकी प्रदेशका तराईका एक–दुई स्थानमा पनि वर्षाको सम्भावना रहेको छ।

बागमती र गण्डकी प्रदेशका पहाडी भूभागका एक–दुई स्थानमा भारी वर्षा हुन सक्ने अनुमान गरिएको छ। सुदूरपश्चिम प्रदेशका पहाडी र तराई क्षेत्रमा भने भारीदेखि धेरै भारी वर्षा हुन सक्ने महाशाखाको प्रक्षेपण छ।

रातिको समयमा पनि बागमती, गण्डकी, लुम्बिनी र सुदूरपश्चिम प्रदेशका पहाडी तथा तराई क्षेत्रका केही स्थान, कर्णाली प्रदेशका पहाडी क्षेत्रका थोरै स्थान तथा मधेस र कोसी प्रदेशका एक–दुई स्थानमा मेघगर्जन र चट्याङसहित मध्यम वर्षाको सम्भावना रहेको छ। गण्डकी र बागमती प्रदेशका केही स्थानमा भारी वर्षा हुन सक्ने जनाइएको छ।

काठमाडौँ उपत्यकामा पनि आज मध्यम वर्षाको सम्भावना रहेको मौसमविद्ले बताएका छन्। मौसमविद् रोजन लामिछानेका अनुसार बिहान हल्का वर्षा भए पनि दिउँसो पुनः बादल बढ्दै हल्कादेखि मध्यम वर्षा हुन सक्ने सम्भावना छ।

यस्तै, बाढी पूर्वानुमान महाशाखाले आज कञ्चनपुर, कैलाली, रूपन्देही, कपिलवस्तु, नवलपरासी (पश्चिम) र आसपासका जिल्लाबाट बग्ने साना नदी तथा खोलामा बहाव उल्लेख्य बढ्न सक्ने जनाएको छ। ती क्षेत्रमा आकस्मिक बाढीको मध्यम जोखिम रहेकाले नदी तटीय क्षेत्रमा बसोबास गर्ने तथा आवतजावत गर्ने सर्वसाधारणलाई सतर्कता अपनाउन आग्रह गरिएको छ।