प्रमुख प्रतिपक्षी दल नेपाली कांग्रेसले प्रतिनिधिसभा नियमावलीविरुद्ध सर्वोच्च अदालतमा रिट दायर गरेको छ। नियमावलीका केही व्यवस्था संविधानविपरीत रहेको दाबी गर्दै कांग्रेस अदालत पुगेको हो।
बिहीबार कांग्रेसका तर्फबाट प्रतिनिधिसभा संसदीय दलका उपनेता अभिषेकप्रताप शाह र राष्ट्रियसभाका सचेतक पदम परियारले सर्वोच्च अदालतमा रिट दायर गरेका हुन्। रिट पेस भए पनि हालसम्म दर्ता भने भइसकेको छैन।
प्रतिनिधिसभाले गत जेठ २१ गते नियमावली पारित गरेको थियो। उक्त नियमावलीलाई थप छलफलका लागि समितिमा पठाउनुपर्ने कांग्रेसको माग अस्वीकार भएपछि पार्टी सर्वोच्च अदालत गएको हो।
कांग्रेसले नियमावलीमा प्रतिनिधिसभा र राष्ट्रियसभाका तत्काल कायम रहेका सम्पूर्ण सदस्य संख्याको दुईतिहाइ मतको गणना गर्ने अधिकार सभामुखलाई दिइएको व्यवस्थामाथि पनि प्रश्न उठाएको छ। संविधानविपरीत सभामुखलाई यस्तो अधिकार दिइएको जिकिर कांग्रेसको छ।
यस्तै, नियमावलीको दफा २४७ मा तीन वर्षभन्दा बढी कैद सजाय हुने तथा नैतिक पतन हुने फौजदारी कसुरमा अभियोग लागेर थुनामा रहेका सांसदलाई मात्र निलम्बन हुने व्यवस्था गरिएको विषयमा पनि कांग्रेसले असहमति जनाएको छ। यस्तो व्यवस्थाले फौजदारी कसुरमा उन्मुक्ति दिन खोजिएको कांग्रेसको दाबी छ।
संविधान र कानुनभन्दा नियमावलीलाई माथि राख्ने अवस्था सिर्जना भएको भन्दै कांग्रेसले उक्त व्यवस्था गैरसंवैधानिक रहेको जिकिरसहित सर्वोच्च अदालतमा रिट दायर गरेको हो।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
