अविरल वर्षाका कारण देशका विभिन्न राजमार्गमा पहिरो, ढुंगा खस्ने तथा हिलो जम्दा यातायात प्रभावित भएको छ। केही सडक पूर्ण रूपमा अवरुद्ध भएका छन् भने केहीमा निश्चित समयका लागि सवारी सञ्चालनमा रोक लगाइएको छ।
नेपाल प्रहरीका अनुसार मकवानपुरको कान्तिलोकपथमा खसेको पहिरो हटाइएपछि उक्त सडक शुक्रबार बिहानदेखि पूर्ण रूपमा सञ्चालनमा आएको छ।
बुधबार साँझ मकवानपुरको बकैया गाउँपालिका–११ घट्टेपाखास्थित कान्तिलोकपथ सडकखण्डमा माथिबाट पहिरो खसेपछि यातायात पूर्ण रूपमा अवरुद्ध भएको थियो।
यता, काभ्रेपलाञ्चोक र सिन्धुली जोड्ने खुर्कोट–नेपालथोक–कटुन्जेबेँसीस्थित बिपी राजमार्गमा सम्भावित बाढीको जोखिमलाई ध्यानमा राख्दै दैनिक बेलुका ६ बजेदेखि बिहान ४ बजेसम्म सबै प्रकारका सवारीसाधन सञ्चालनमा रोक लगाइएको छ।
त्यसैगरी, मकवानपुरस्थित कान्तिलोकपथमा पनि वर्षायामको जोखिमलाई मध्यनजर गर्दै बेलुका ५ बजेदेखि बिहान ५ बजेसम्म सबै प्रकारका सवारीसाधन सञ्चालनमा रोक लगाइएको प्रहरीले जनाएको छ।
यसैबीच, इलाम नगरपालिका–९ राजदुवालीस्थित मेची राजमार्ग हिलोका कारण पूर्ण रूपमा अवरुद्ध भएको छ। प्रहरीले उक्त सडक प्रयोग नगरी वैकल्पिक मार्ग प्रयोग गर्न सर्वसाधारणलाई अनुरोध गरेको छ।
अर्घाखाँचीको पाणिनि गाउँपालिका–२ स्थित सालझन्डी–ढोरपाटन सडकखण्डमा ढुंगा खस्दा पनि यातायात पूर्ण रूपमा अवरुद्ध भएको छ।
त्यसैगरी, सिन्धुपाल्चोकको भोटेकोशी गाउँपालिका–४ जिरोकिलोस्थित अरनिको राजमार्ग पहिरोका कारण बन्द भएको नेपाल प्रहरीले जनाएको छ।
प्रहरीका अनुसार सडक विभागसहित सम्बन्धित निकायहरूले अवरुद्ध सडक खुलाउने काम जारी राखेका छन्। वर्षायाममा पहिरो र बाढीको जोखिम बढेकाले यात्रा गर्दा आवश्यक सावधानी अपनाउन पनि प्रहरीले आग्रह गरेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
