हङकङमा बसिरहेका नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवा लडेर घाइते भएका छन्। काठमाडौं पाटी डट कममा प्रकाशित एक समाचारका अनुसार शौचालयमा लड्दा उनको एउटा हात भाँचिएको दाबि गरिएको छ ।
काठमाडौं पाटी डट कमको स्रोतका अनुसार उक्त घटना गत साता भएको हो। उपचारपछि देउवा हाल आराम गरिरहेका छन्।
देउवाले आफू घाइते भएको विषय कांग्रेसका पूर्वकार्यवाहक सभापति पूर्णबहादुर खड्का, पूर्वमहामन्त्री कृष्णप्रसाद सिटौला, प्रकाशमान सिंह, रमेश लेखकलगायत नेताहरूलाई जानकारी गराएको बताइएको छ।
नेता पूर्णबहादुर खड्कासँग भेटेका एक केन्द्रीय सदस्यले पनि देउवा घाइते भएको पुष्टि गरेका छन्। उनका अनुसार शौचालयमा लड्दा देउवाको हात भाँचिएको जानकारी प्राप्त भएको हो।
देउवा गत फागुन १३ गते नियमित स्वास्थ्य परीक्षणका लागि आफ्ना स्वकीय सचिवसमेत रहेका भतिजा भानु देउवासँगै सिंगापुर गएका थिए। त्यसपछि उनी पत्नी आरजु राणा देउवासँग हङकङ पुगेका थिए। त्यतिबेला उनको सचिवालयले थप स्वास्थ्योपचार र पारिवारिक कार्यक्रममा सहभागी हुन हङकङ गएको जनाएको थियो।
हङकङबाट नेपाल फर्किने तयारी भइरहेका बेला जिल्ला अदालत काठमाडौंले सम्पत्ति शुद्धीकरण अनुसन्धान विभागको पत्रका आधारमा चैत तेस्रो साता पक्राउ पुर्जी जारी गरेपछि देउवा दम्पती उतै रोकिएको बताइएको छ।
प्रहरी प्रधान कार्यालयले इन्टरपोलमार्फत रेड कर्नर नोटिस जारी गर्न दुईपटक पत्राचार गरे पनि अन्तर्राष्ट्रिय प्रहरी संगठन (इन्टरपोल) ले राजनीतिक व्यक्तिविरुद्ध रेड नोटिस जारी गर्न नमिल्ने भन्दै अस्वीकार गरेको बताइएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
