जनकपुरस्थित जानकी मन्दिर परिसरमा श्रम संस्कृति पार्टीका अध्यक्ष हर्कराज साम्पाङलाई स्वागत गर्न पुगेका पार्टीका नेता तथा कार्यकर्तालाई हिन्दु सम्राट सेनाका कार्यकर्ताले लखेटेका छन्।

मंगलबार जानकी मन्दिर दर्शनका लागि हर्क साम्पाङ जनकपुर आउने कार्यक्रम थियो। उनी आउनुअघि स्वागतका लागि मन्दिर पुगेका पार्टीका नेता तथा कार्यकर्तामाथि अवरोध गरिएको हो।

हर्क साम्पाङ पार्टीको कार्यक्रममा सहभागी हुन जनकपुर जाने तयारीमा छन्। हिन्दु सम्राट सेनाले भने विगतमा साम्पाङले गाई काटेर खानुपर्ने अभिव्यक्ति दिएको भन्दै उनलाई जनकपुरमा प्रवेश गर्न नदिने चेतावनी दिएको छ।

घटनापछि साम्पाङले सामाजिक सञ्जालमार्फत प्रतिक्रिया जनाएका छन्। उनले फेसबुकमा लेखेका छन्, ‘गाई कसले खाएको रैछ? गाई खानेलाई मन्दिरमा पस्न नदिने भनेको देखें! यो कसले कस्तो राजनीति गर्न खोजेको रैछ? जय जानकी मन्दिर!’

यसअघि उनले अर्को स्टाटसमा जनकपुरमा विवाद भएको र गृहमन्त्रीको फोन अफ रहेको उल्लेख गरेका थिए। ‘जनकपुरमा लफडा, गृहमन्त्रीको फोन अफ!’ भन्दै उनले विगतका विषय र धर्मलाई लिएर विवाद सिर्जना गरिएको दाबी गरेका छन्।

साम्पाङले आफ्ना पार्टीका नेता तथा कार्यकर्तालाई संयमित रहन पनि आग्रह गरेका छन्।

श्रम संस्कृति पार्टीले आज जनकपुरमा साधारण सभा तथा पार्टी प्रवेश कार्यक्रम आयोजना गरेको छ।