सुनसरीको देवानगञ्ज गाउँपालिका–३, कप्तानगञ्जमा भएको हिंसात्मक घटनाको छानबिन गर्न सरकारले पाँच सदस्यीय समिति गठन गरेको छ। सुरक्षाकर्मीको गोली लागेर एक जनाको मृत्यु तथा १६ जना घाइते भएपछि सरकारले छानबिन प्रक्रिया अघि बढाएको हो।

सोमबार बिहान गृहमन्त्री सुधन गुरुङको अध्यक्षतामा बसेको बैठकले गृह मन्त्रालयका सहसचिव भूपेन्द्र थापाको संयोजकत्वमा पाँच सदस्यीय छानबिन समिति गठन गर्ने निर्णय गरेको हो। समितिलाई एक साताभित्र प्रतिवेदन बुझाउने जिम्मेवारी दिइएको छ।

आइतबार राति दुई समूहबीच भएको झडप नियन्त्रण गर्ने क्रममा सुरक्षाकर्मीले गोली चलाउँदा स्थानीय ओमप्रकाश मेहता गम्भीर घाइते भएका थिए। उपचारका लागि विराटनगरस्थित न्युरो अस्पताल लगिए पनि चिकित्सकले उनलाई मृत घोषणा गरेका थिए।

घटनामा प्रदर्शनकारीतर्फ आठ जना र प्रहरीतर्फ प्रहरी निरीक्षक राकेश राईसहित आठ जना सुरक्षाकर्मी घाइते भएका छन्।

घाइते प्रदर्शनकारीहरूको कोशी अस्पताल र विराट नर्सिङ होममा उपचार भइरहेको छ। प्रहरीतर्फ घाइते हुनेमा प्रहरी नायब निरीक्षक गणेशनारायण श्रेष्ठ, प्रहरी सहायक निरीक्षक नवराज पोखरेल, प्रहरी वरिष्ठ हवल्दार अमरलाल यादव तथा अन्य चार प्रहरी कर्मचारी रहेका छन्।

घटनापछि सुनसरीको देवानगञ्ज गाउँपालिका–३, कप्तानगञ्ज क्षेत्रमा स्थानीय प्रशासनले कर्फ्यु आदेश जारी गरेको छ।