भूमि सम्बन्धी काममा घुस लिएको आरोपमा भक्तपुरस्थित भूमि सुधार तथा मालपोत कार्यालयका प्रमुख घुससहित पक्राउ परेका छन्।
मालपोत प्रमुख कुमार आचार्यलाई अख्तियार दुरुपयोग अनुसन्धान आयोगको टोलीले मंगलबार २४ लाख ५० हजार रुपैयाँ घुससहित पक्राउ गरेको हो।
चाँगुनारायण नगरपालिका–९ मा रहेको १४ रोपनी ४ आना जग्गाको मोहीको नाममा धनी प्रमाण पुर्जा बनाउने प्रयोजनका लागि आचार्यले घुस मागेको सूचनाको आधारमा आयोगले कारबाही अघि बढाएको हो।
५४ वर्षीय आचार्य उदयपुरको बेलका नगरपालिका–४ स्थायी घर भई हाल काठमाडौंको कागेश्वरी मनोहरा नगरपालिका–७ फोर्सपार्क टोलमा बस्दै आएका छन्। उनलाई भक्तपुरको व्यासीस्थित मालपोत कार्यालयबाटै रंगेहात पक्राउ गरिएको अख्तियारले जनाएको छ।
अख्तियारका अनुसार, कार्यालय प्रमुख आचार्यसँगै कार्यालय सहयोगी ५१ वर्षीय टीकाराम राउतलाई पनि नियन्त्रणमा लिइएको छ। राउत चाँगुनारायण नगरपालिका–९, राउट टोल स्थायी बासिन्दा हुन् भने हाल लोकन्थलीमा बस्दै आएका छन्।
पक्राउको क्रममा आयोगको टोलीले आचार्य र राउतको साथबाट दुई थान मोबाइल फोन र २४ लाख ५० हजार रुपैयाँ नगद बरामद गरेको छ।
अख्तियारले अनुसन्धानको कार्य अघि बढाएको जनाएको छ भने यो घटनाले सरकारी कार्यालयमा व्याप्त गम्भीर भ्रष्टाचारको झलक देखाएको छ।
