नयाँ पुस्ताका कलाकार अहान पाण्डे र अनीत पड्डा अभिनीत बलिउड फिल्म ‘सैयारा’ ले बक्स अफिसमा धमाकेदार सफलता पाइरहेको छ। मोहित सुरीको निर्देशनमा बनेको यो प्रेमकथानक फिल्म प्रदर्शनको १७ औं दिनसम्म आइपुग्दा भारतमा २९३ करोड नेट कमाइ गरिसकेको छ।
यशराज फिल्म्सको ब्यानरमा निर्माण गरिएको सैयारा ले पहिलो सातामै १७२.७५ करोडको व्यापार गरेको थियो भने दोस्रो साता १०७ करोड कमाउँदै ब्यापक चर्चा बटुलेको छ। ४५ करोड भारतीय रुपैयाँ बजेटमा बनेको यो फिल्म नयाँ कलाकारहरू अभिनीत हिन्दी सिनेमाको इतिहासमै सबैभन्दा धेरै कमाइ गर्ने फिल्म बन्ने दिशामा अघि बढिरहेको छ।
मोहित सुरीका अघिल्ला हिट फिल्महरू ‘आशिकी २’, ‘एक भिलेन’, ‘आवारापन’ जस्ता प्रेम र इमोशन केन्द्रित छन्, जसको क्रम सैयारा मा पनि देखिएको छ। फिल्मले दर्शकहरूको मन जित्न सफल भएको छ भने अहान र अनीतको अभिनयले समीक्षकबाट समेत प्रशंसा पाएको छ।
यो फिल्म अहान पाण्डेको डेब्यु प्रोजेक्ट हो। सामाजिक सञ्जालमा उल्लेख्य फलोइङ बनाइसकेका अहानले पर्दामा गरेको प्रस्तुतीलाई दर्शकले खुलेर स्वागत गरेका छन्। अनीत पड्डा यसअघि वेब सिरिज ‘बिग गर्ल्स डोन्ट क्राइ’ र फिल्म ‘सलमा भेन्की’ मा देखिइसकेकी हुन्।
