नागरिक उन्मुक्ति पार्टीकी अध्यक्ष रञ्जिता श्रेष्ठले संसदीय दलका नेता गंगाराम चौधरीमाथि कारबाही गर्दै संसद सचिवालयलाई औपचारिक जानकारी गराएकी छन्।
पार्टीले मागेको स्पष्टीकरणमा चित्तबुझ्दो जवाफ नदिएको र पुनः माग्दा समेत प्रतिक्रिया नआएको कारण कारबाही गरिएको अध्यक्ष श्रेष्ठको पत्रमा उल्लेख छ।
श्रेष्ठले चौधरीमाथि पार्टीको महासचिव पद नभए पनि लेटरप्याड र छापको दुरुपयोग गरी पार्टीको हितविपरीत गतिविधि गरेको, विधान विपरीत केन्द्रीय कमिटीको बैठक बोलाउने निर्णय गरेको, संवैधानिक आयोगको रूपमा रहने निर्वाचन आयोगको निर्णय विपरीत पत्राचार र निर्णयहरू गरेको आरोप लगाएकी छन्। साथै, उनले दल त्याग गरेका र पदाधिकारी नरहेका व्यक्तिलाई समेत बैठकमा सामेल गराएको दाबी गरेकी छन्।
यो कदमले हालै चुलिएको पार्टीभित्रको विवादलाई थप तीव्र बनाएको छ। पछिल्लो समय संरक्षक रेशम चौधरी पक्ष र अध्यक्ष श्रेष्ठ पक्षबीच तीव्र मतभेद देखिँदै आएको छ। रेशम चौधरी पक्षले श्रेष्ठलाई अध्यक्षबाट हटाएको घोषणा गरे पनि निर्वाचन आयोगले त्यसलाई मान्यता दिएको छैन।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
