अमेरिकी अर्थमन्त्री स्कट बेसेन्टले भारतले रूसबाट सस्तोमा तेल खरिद गरी प्रशोधनपछि उच्च मूल्यमा बिक्री गरेर नाफा कमाइरहेको भन्दै आलोचना गरेका छन्। उनले भारतको यस्तो व्यापार अभ्यासलाई “पूर्णतया अस्वीकार्य” भनेका छन्।
समाचार एजेन्सी पीटीआईका अनुसार, मंगलबार सीएनबीसी च्यानलमा चीन र भारतसँग अमेरिकाको दोहोरो मापदण्डबारे सोधिएको प्रश्नको जवाफमा बेसेन्टले भारतको तेल आयातमा तीव्र वृद्धि भएको उल्लेख गरे। उनका अनुसार, रूस-युक्रेन युद्धपछि चीनको तेल आयात करिब ३ प्रतिशतले मात्रै बढेको भए पनि भारतको आयात ४० प्रतिशतभन्दा बढीले बढेको छ।
उनले भने, “भारतले यसबाट केवल नाफा कमाएको छ। देशले करिब १६ अर्ब डलर अतिरिक्त आम्दानी गरेको छ, जसबाट केही धनी परिवारहरूले पनि ठूलो लाभ लिएका छन्।”
ट्रम्प प्रशासनले भारतमा कुल ५० प्रतिशत कर लगाउने घोषणा गरिसकेको छ। यससँगै रूसी तेल खरिदमा थप २५ प्रतिशत कर पनि समावेश गरिएको छ, जुन आगामी अगस्ट २७ देखि लागू हुनेछ। बेसेन्टले ब्लूमबर्गलाई दिएको अन्तर्वार्तामा भारतले रूससँग निरन्तर तेल कारोबार जारी राखे थप प्रतिबन्ध लगाउने चेतावनी दिएका छन्।
तर, भारतले अमेरिकी कदमलाई अनुचित बताउँदै आफ्नो राष्ट्रिय हित र आर्थिक सुरक्षाका लागि आवश्यक सबै उपाय अपनाउने चेतावनी दिएको छ। भारतीय वाणिज्य तथा उद्योग राज्यमन्त्री जितिन प्रसादले संसदलाई भारत–अमेरिका व्यापार सम्झौताका लागि वार्ता भइरहेको जानकारी दिएका छन्।
उनका अनुसार दुवै देशबीच अहिलेसम्म पाँच चरणको वार्ता भइसकेको छ। तर, अगस्ट २५ बाट हुने भनिएको छैटौं चरण अमेरिकी पक्षले रोकेको छ। भारत र अमेरिकाबीच गैर-संवेदनशील कृषि उत्पादनसहित विभिन्न वस्तुहरूको व्यापार उदारीकरणबारे पनि छलफल भइरहेको बताइएको छ।
