नेपालको संविधान घोषणाको दशकलाई विशेष उत्सवका रूपमा मनाउन सरकारले तयारी थालेको छ। यसका लागि प्रधानमन्त्री केपी शर्मा ओलीको अध्यक्षतामा मूल समारोह समिति गठन गरिएको छ।
२०७२ साल असोज ३ गते जनता निर्वाचित संविधानसभाबाट संघीय लोकतान्त्रिक गणतन्त्रसहितको नेपालको संविधान जारी भएको थियो। संविधान जारी भएको ऐतिहासिक दिनलाई प्रत्येक वर्ष राष्ट्रिय दिवसका रूपमा मनाइँदै आएको छ। यस वर्ष संविधान घोषणाको दसौँ वर्ष पुगेकाले कार्यक्रमलाई भव्य रूपमा मनाइने भएको हो।
प्रधानमन्त्री तथा मन्त्रिपरिषद्को कार्यालय सिंहदरबारमा आइतबार बसेको बैठकले आगामी असोज २, ३ र ४ गते नेपालभित्र मात्र नभई विदेशस्थित नेपाली दूतावास तथा नियोगमार्फत पनि विविध कार्यक्रमसहित दिवस मनाउने निर्णय गरेको हो। यस अवसरमा दीपावली, झाँकी, प्रदर्शनी, राष्ट्रिय गान, राष्ट्रभक्तिपूर्ण संगीत महोत्सव (National Day Concert) लगायतका कार्यक्रम हुनेछन्।
मूल समारोह समितिमा उपप्रधानमन्त्री, मन्त्री, राज्यमन्त्री, नेपाल सरकारका मुख्यसचिव, नेपाली सेनाका प्रधानसेनापति, विभिन्न सचिव, काठमाडौं उपत्यकाका स्थानीय तहका प्रमुख तथा उपप्रमुख, सुरक्षा निकायका प्रमुखसहित गृह मन्त्रालयका सचिव सदस्यसचिव रहनेछन्। बैठकले दिवस सफल बनाउन विषयगत उपसमिति पनि गठन गरेको छ।
संविधान दिवसको मूल समारोह असोज ३ गते टुँडिखेलस्थित सैनिक मञ्चमा सर्वसाधारणको उपस्थिति बीच आयोजना गरिनेछ। यस्तै प्रदेश र स्थानीय तहमा समेत समानान्तर कार्यक्रम हुनेछन्। साथै संविधान निर्माणको ऐतिहासिक पृष्ठभूमि, यसको महत्व, र संविधानमा समावेश विचारबारे विशेष संवाद, परिसंवाद, सन्देशमूलक नाटक लगायत कार्यक्रम मञ्चन गरिने प्रस्ताव गरिएको छ।
रेडियो नेपाल, नेपाल टेलिभिजन, सामुदायिक वा निजी सञ्चारमाध्यम र सामाजिक सञ्जालमार्फत संविधान दिवस सम्बन्धी विशेष कार्यक्रम प्रसारण गर्ने तयारीसमेत गरिएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
