नेपालमा मानव बेचबिखन तथा ओसारपसारका घटना बढ्दै गएका छन्। महिला, बालबालिका तथा ज्येष्ठ नागरिक मन्त्रालयले बुधबार सार्वजनिक गरेको ‘मानव बेचबिखन तथा ओसारपसार नियन्त्रण राष्ट्रिय प्रतिवेदन २०८१’ अनुसार गत आर्थिक वर्षमा हजारौं व्यक्ति जोखिममा परेका छन्।
नेपाल प्रहरीले मात्र १२७ जनालाई स्वदेश र विदेशबाट उद्धार गरेको छ। त्यस्तै, १० जिल्लामा रहेका पुनर्स्थापना केन्द्रमार्फत ७५८ जना र विभिन्न सङ्घसंस्थामार्फत २,७३२ जना गरी जम्मा ३,४९० पीडितलाई उद्धार र पुनर्स्थापना गरिएको प्रतिवेदनमा उल्लेख छ।
नेपाल–भारत सीमा नाकासहित विभिन्न स्थानमा रहेका सूचना केन्द्रहरूले सुरक्षाकर्मीहरूको सहयोगमा ४,३०० जनालाई बेचबिखनको जोखिमबाट बचाएका छन्। तीमध्ये ६४.३ प्रतिशत महिला, ३३.४ प्रतिशत बालिका, ०.४ प्रतिशत पुरुष र १.९ प्रतिशत बालक रहेका मन्त्रालयले जनाएको छ।
यससँगै, ७७,५०० जनाले मानव बेचबिखनविरुद्ध परामर्श सेवा प्राप्त गरेका छन्। गत वर्ष मात्र १७ बालिका बेचबिखनमा परे भने ४६ बालिका अपहरणमा परेका थिए। साथै ६,५९० बालबालिका हराएकोमा करिब ५,८३१ जनालाई खोजतलास गरी पारिवारिक पुनर्मिलन गरिएको छ।
मन्त्रालयका प्रवक्ता चक्रबहादुर बुढाका अनुसार मानव बेचबिखनविरुद्धको राष्ट्रिय नीति र कार्ययोजना तयार पारिँदैछ। यसका लागि संघ, प्रदेश, स्थानीय तह, नागरिक समाज र पीडितहरूसँग छलफल भइरहेको छ।
यस्तै, समुदाय–प्रहरी साझेदारी कार्यक्रमअन्तर्गत ७५३ वटै स्थानीय तहमा २४ हजारभन्दा बढी समिति गठन गरी महिला हिंसा, साइबर अपराध, जबर्जस्ती करणी, बालविवाह, बहुविवाह, दाइजो प्रथा लगायत मुद्दामा जनचेतना अभिवृद्धि गरिएको मन्त्रालयले जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
