राष्ट्रपति रामचन्द्र पौडेलले प्रतिनिधिसभाबाट मन्त्रिपरिषद् गठन गर्ने उपाय नभएपछि आम सहमतिबाट निकास खोजिएको अवस्थालाई सबैले बुझेर आगामी ६ महिनाभित्र निर्वाचन सम्पन्न गर्न आग्रह गरेका छन्।
संविधान दिवसको अवसरमा राष्ट्रपति कार्यालयमा आयोजित विशेष समारोहलाई सम्बोधन गर्दै उनले सबै राजनीतिक दल, प्रशासनिक निकाय, बौद्धिक समुदाय र नागरिकलाई असहमति र द्वन्द्व छोडी सहकार्यसाथ चुनावलाई सफल बनाउन सक्रिय हुन आह्वान गरे।
राष्ट्रपति पौडेलले संविधानलाई नेपाली जनताको सर्वभौमसत्ता, स्वतन्त्रता र समान अधिकार सुनिश्चित गर्ने ऐतिहासिक उपलब्धि भन्दै यसको रक्षा गर्न सबैलाई आग्रह गरे। उनले लोकतन्त्रलाई बलियो बनाउन सबै पुस्ताको सहभागिता आवश्यक रहेको उल्लेख गर्दै आफू पनि १७ वर्षकै उमेरदेखि राजनीतिक यात्रामा होमिएको स्मरण गरे।
उनले हालको अन्तरिम सरकारले राष्ट्रिय क्षतिको पुनःनिर्माण गर्दै ६ महिनाभित्र चुनाव सम्पन्न गरी जनप्रतिनिधिमूलक संस्थालाई सत्ता हस्तान्तरण गर्ने विश्वास व्यक्त गरे। “यो अहिले सबै नेपालीको साझा कार्यभार हो,” उनले भने।
भदौ २३ र २४ गतेको विरोध प्रदर्शनमा भएको ठूलो मानवीय र भौतिक क्षतिप्रति दुःख व्यक्त गर्दै राष्ट्रपति पौडेलले ज्यान गुमाएका युवाप्रति श्रद्धाञ्जली अर्पण गरे र घाइते परिवारको पीडा महसुस गर्ने बताउँदै संवैधानिक दायित्वअनुसार सुधार र समृद्धिको बाटोमा अघि बढ्न सबैलाई आह्वान गरे।
राष्ट्रपति पौडेलले भ्रष्टाचार र बेथितिको अन्त्य, रोजगारी सिर्जना, सुशासन र सामाजिक न्यायलाई प्राथमिकता दिनुपर्ने उल्लेख गर्दै “यही युवा पुस्ताको माग हो, यसलाई आत्मसात गरेर अघि बढ्नैपर्छ” भनेर जोड दिए।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
