बडादशैं अन्तर्गत नवरात्रको चौथो दिन आज, आश्विन शुक्ल चतुर्थी तिथिमा नवदुर्गामध्येकी चौथो स्वरूप देवी कुष्माण्डाको विधिपूर्वक पूजा आराधना भइरहेको छ। देशभरका दशैंघर, शक्तिपीठ तथा पूजाकोठाहरूमा भक्तजनले देवीको उपासना गरिरहेका छन्।
‘कु’ अर्थात् ‘कुत्सित’ ऊष्मालाई ‘कुष्मा’ भनिन्छ, जसले त्रिविध ताप (आध्यात्मिक, आधिभौतिक र आधिदैविक) लाई जनाउँछ। यी तीनै तापयुक्त संसारलाई आफ्नो गर्भमा धारण गर्ने देवी कुष्माण्डा हुन्। श्री दुर्गा सप्तशतीमा पनि उनका स्वरूपको व्याख्या ‘कुत्सितः ऊष्मा कुष्मा-त्रिविधतापयुतः संसारः, स अण्डे मांसपेश्यामुदररुपायां यस्याः सा कूष्माण्डा’ उल्लेख गरिएको छ।
नवरात्रको पहिलो दिन घटस्थापना गरी जमरा राख्ने परम्परा अनुसार शैलपुत्री, दोस्रो दिन ब्रह्मचारिणी र तेस्रो दिन चन्द्रघण्टाको पूजा गरिएको थियो। आज चौथो दिन कुष्माण्डा देवीको पूजा हुँदैछ भने आगामी दिनहरूमा क्रमशः स्कन्दमाता, कात्यायनी, कालरात्रि, महागौरी र सिद्धिदात्रीको पूजाआराधना गरिने शास्त्रीय विधान छ।
नवरात्रभरि दुर्गा सप्तशती (चण्डी) र श्रीमद्देवीभागवत जस्ता स्तोत्रहरूको पाठ गरिन्छ। भक्तजनको विश्वासअनुसार देवीको आराधनाले शक्ति, ऐश्वर्य र विद्या प्राप्त हुने धार्मिक महत्व छ।
काठमाडौं उपत्यकाका गुह्येश्वरी, मैतीदेवी, कालिकास्थान, भद्रकाली, नक्साल भगवती, शोभा भगवती, विजेश्वरी, इन्द्रायणी लगायतका मन्दिरहरूमा बिहानैदेखि दर्शनार्थीको भीड लागेको छ। त्यस्तै उपत्यकाबाहिर पलाञ्चोक भगवती, छिन्नमस्ता, गढीमाई, मनकामना, बागलुङ कालिका, विन्ध्यवासिनी लगायतका शक्तिपीठहरूमा पनि भक्तजनको आगमन उच्च रहेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
