विश्व पर्यटन दिवस मनाइँदै गर्दा देशभरको पर्यटकीय गन्तव्यहरु सुनसान देखिएका छन्। दसैँ र तिहारको मुख्य सिजनमा आन्तरिक र विदेशी पर्यटकको उपस्थिति कम हुँदा पर्यटन क्षेत्र ठूलो प्रभावमा परेको छ। यसमा पछिल्लो जेन–जी आन्दोलनले प्रमुख कारणको रुपमा काम गरेको व्यवसायीहरूले बताएका छन्।
बन्दीपुरमा विगतका वर्षमा दसैँमा होटल र होमस्टे पूर्ण रूपले भरिन्थे भने यस वर्ष करिब १०० पर्यटक मात्रै आएका छन्। अध्यक्ष सुरेन्द्र थापाका अनुसार आन्दोलनपछि पर्यटकको संख्या अत्यन्तै घटेको छ।
सौराहामा पनि अवस्था उस्तै छ। क्षेत्रीय होटल संघ सौराहाका पूर्वअध्यक्ष दीपक भट्टराईले भने, “जेन–जी आन्दोलनपछि सबै बुकिङ रद्द भएको छ। विगतमा ८०–९० प्रतिशत बुकिङ हुने गर्दथ्यो भने अहिले पाँच प्रतिशत मात्र बाँकी छ।” विशेषगरी विदेशी पर्यटकले धेरै बुकिङ रद्द गरेका छन्।
पोखरा, लुम्बिनी, बर्दिया र बागलुङका प्रमुख पर्यटकीय स्थलमा पनि पर्यटकको संख्या आधाभन्दा बढी घटेको छ। बर्दियामा भारतीय पर्यटकको आगमन पनि घट्दा होटलहरू सुनसान छन्।
आन्दोलनका क्रममा भएको तोडफोड, लुटपाट र आगजनीले पर्यटन पूर्वाधारमा रु २५ अर्ब बराबरको क्षति पुगेको छ। काठमाडौँका पाँचतारे होटल हायात रिजेन्सी, हिल्टन होटल, पोखराका होटलहरू तथा केबलकार लगायतका संरचनामा ठूलो क्षति भएको छ।
नेपाल पर्यटन बोर्डका सीईओ दीपकराज जोशीले भने, “हाल पर्यटन क्षेत्र रिकभरको चरणमा छ। गत साता देश आएका पर्यटकको संख्या बढ्दै गएको छ। सरकार र निजी क्षेत्र एकसाथ रहेर पर्यटन क्षेत्रलाई पुनर्जीवित गर्ने प्रयासमा छन्।”
संस्कृति, पर्यटन तथा नागरिक उड्डयन मन्त्रालयका सचिव हरिप्रसाद मैनालीले भने, “निजी क्षेत्रको सहकार्य बिना पर्यटनको विकास सम्भव छैन। आवश्यक नीति र वातावरण तयार गर्न हामी सधैं तत्पर छौं।”
विशेषज्ञहरूको भनाइ अनुसार, जेन–जी आन्दोलनपछि पर्यटन क्षेत्रमा आएको यो असर अल्पकालीन भए पनि उद्योगको मनोबलमा प्रभाव परेको छ। सरकारले निजी क्षेत्रसँग समन्वय गर्दै पर्यटनलाई पुनः सक्रिय बनाउने प्रयास अघि बढाइरहेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
