राप्ति स्वास्थ्य विज्ञान प्रतिष्ठानमा हाल बिरामीको संख्या तीव्रगतिमा बढ्दै गएको छ। पछिल्लो आर्थिक वर्ष २०८१/०८२ मा मात्रै २ लाख १८ हजारभन्दा बढी बिरामीले यहाँको सेवा लिएका छन्। बिरामीको बढ्दो चापसँगै अस्पतालमा शैय्या अभाव हुने अवस्था देखिएको छ।
प्रतिष्ठानका तथ्यांकअनुसार चालु वर्षमा वहिरंग सेवा लिने बिरामी २ लाख ४ हजार १ सय जना र अन्तरंग (भर्ना) सेवा लिने बिरामी १३ हजार ९ सय ७९ जना रहेका छन्। अघिल्लो आर्थिक वर्ष २०८०/०८१ मा यो संख्या १ लाख ७६ हजार ९ सय ७४ मात्र थियो।
त्यसअघि आर्थिक वर्ष २०७९/८० मा १ लाख ६० हजार ६ सय ५८ जना बिरामीले मात्र सेवा लिएका थिए। यसले पछिल्ला तीन वर्षयता बिरामीको संख्या निरन्तर बढिरहेको स्पष्ट देखाउँछ।
प्रतिष्ठानका सूचना अधिकारीका अनुसार बिरामीको चाप बढ्नुका पछाडि विशेषज्ञ सेवा, आधुनिक उपकरण र सेवाको पहुँच विस्तार मुख्य कारण हुन्।
युरोलोजी र युरो सर्जरी सेवा पनि सञ्चालनमा आइसकेको छ। आगामी महिनाभित्र ४ सय शैय्या क्षमताको नयाँ भवन निर्माण कार्य सुरु हुने लम्सालले बताए।
साथै, प्रतिष्ठानले सामुदायिक स्वास्थ्य सेवा विस्तार गर्दै रोल्पाको होलेरी र त्रिवेणीमा नयाँ स्वास्थ्य केन्द्र सञ्चालनमा ल्याएको छ। एमबिबिएस कार्यक्रम पनि सहज रूपमा सञ्चालन भइरहेको छ।
हाल प्रतिष्ठानमा ३ सय २० ओटा शैय्या सक्रिय छन्। तर बिरामीको चाप तीव्र गतिमा बढेकाले थप शैय्या र स्वास्थ्यकर्मीको आवश्यकता बढेको देखिएको छ।
