अछामबाट धनगढीतर्फ आउँदै गरेको यात्रुवाहक गाडी डोटीमा दुर्घटनाग्रस्त हुँदा एक जनाको मृत्यु भएको छ भने २१ जना घाइते भएका छन्।
प्रहरीका अनुसार सुपप्र०१–००१ ख ३९५६ नम्बरको गाडी आज बिहान जोरायल गाउँपालिका–२, भीमदत्त राजमार्गको भीरमा अनियन्त्रित भई पल्टिएको हो। दुर्घटनामा अछामको मंगलसेन नगरपालिका निवासी २२ वर्षीया हरिया परियारको घटनास्थलमै मृत्यु भएको पुष्टि गरिएको छ।
दुर्घटनामा ६ बालबालिकासहित २१ जना यात्रु घाइते भएका छन्। घाइतेमध्ये एक जनाको अवस्था गम्भीर रहेको जिल्ला प्रहरी कार्यालय डोटीले जनाएको छ। सबै घाइतेलाई तत्काल उद्धार गरी उपचारका लागि धनगढी पठाइएको हो।
घटनास्थल दुर्गम भेगमा पर्न जाने भएकाले उद्धार कार्यमा स्थानीयवासी, प्रहरी र सशस्त्र प्रहरीको टोलीले संयुक्त रूपमा सहयोग गरेको थियो। प्रारम्भिक अनुसन्धानअनुसार सडक साँघुरो र हिलो भएकाले गाडी अनियन्त्रित भएको हुनसक्ने प्रहरीले अनुमान गरेको छ।
घटनाबारे थप अनुसन्धान भइरहेको प्रहरीले जनाएको छ। मृतक परियारको शव पोस्टमार्टमका लागि जिल्ला अस्पताल डोटी ल्याइएको छ।
