अन्नपूर्ण आधार शिविर क्षेत्रमा गएरातिदेखि भारी हिमपात र खराब मौसमका कारण भ्रमणमा गएका पर्यटकको सुरक्षा तथा सहजीकरणका लागि सुरक्षाकर्मीको टोली परिचालन गरिएको छ।
अन्नपूर्ण गाउँपालिका–४ नारच्याङमा रहेको आधार शिविरमा पर्यटकको ठूलो भीड रहेकाले सञ्चारको पहुँच नभएकाले कुनै आपतकालीन अवस्थामा पर्यटक अलपत्र पर्न सक्ने जोखिम रहेको छ। त्यसैले गाउँपालिका र जिल्ला प्रशासनको समन्वयमा नेपाल प्रहरी र सशस्त्र प्रहरी बलको टोली ‘मौरिस हर्जोग’ पदमार्ग हुँदै आधार शिविरमा प्रस्थान गरेको प्रमुख जिल्ला अधिकारी बद्रीप्रसाद तिवारीले जानकारी दिएका छन्।
टोलीमा हिमाली उद्धारकर्मी इन्द्रसिंह शेरचनसमेत सहभागी छन्। पर्यटकलाई सुरक्षित रहन र हिमाली जोखिम कम गर्न आवश्यक सतर्कता अपनाउने निर्देशन दिइएको छ।
जल तथा मौसम विज्ञान विभागको बुलेटिन अनुसार आगामी शुक्रबारसम्म हिमाली क्षेत्रमा हिमपात र वर्षाको सम्भावना रहेकोले अन्नपूर्ण आधार शिविर, खोप्रालेक, मोहरेडाँडा, पुनहिल लगायतका क्षेत्रमा जाने भ्रमण पूर्णरूपमा रोक लगाइएको छ। गाउँपालिकाले पनि पर्यटकलाई सुरक्षित बस्न र मौसमअनुसार सतर्क रहन आग्रह गरेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
