विवादित गतिविधिका कारण डा. निकोलस भुसाललाई प्रहरीले निगरानीमा राखेको छ। भुसालले हालका र पूर्व प्रधानमन्त्री तथा गृहमन्त्रीसहित काठमाडौं महानगरका मेयर बालेन शाहसमेत लक्षित गर्दै अराजक र हिंसात्मक अभिव्यक्ति दिएका थिए।
शनिबार आयोजित पत्रकार सम्मेलनमा भुसालले भदौ २३ गतेको जेनजी आन्दोलनमा सुरक्षाकर्मीको गोली लागेर १९ जनाको मृत्यु भएको घटनामा तत्कालीन प्रधानमन्त्री केपी शर्मा ओली र गृहमन्त्री रमेश लेखक जिम्मेवार भएको आरोप लगाए। उनले भने, सरकारले कारबाही नगरे आफैं कारबाहीमा अगाडि सर्ने चेतावनीसमेत दिएका थिए।
उनले वर्तमान प्रधानमन्त्री सुशीला कार्कीलाई समेत लक्षित गर्दै ‘हुतिहारा’ भन्दै अपशब्द प्रयोग गरेका थिए भने गृहमन्त्री ओमप्रकाश अर्याललाई चुनौतीसमेत दिएका छन्। भुसालले आफूले बालुवाटार माथि मिसाइल राखेको र कोही नबच्ने भनेर धम्कीसमेत दिएका थिए।
निकोलस पहिले पनि २३ असोजमा माइतीघरमा प्रदर्शन गर्न खोज्दा पक्राउ परेका थिए। स्वास्थ्य जाँच गर्दा गाँजा सेवन गरेको रिपोर्ट आएको थियो। उनका दाजु सागरको जिम्मेवारीमा सुधार केन्द्र लगिएपछि उनलाई छाडिएको थियो।
शनिबारको उग्र अभिव्यक्तिपछि प्रहरीले उनलाई निगरानीमा राखेको र आगामी गतिविधिमा सतर्क रहन आग्रह गरेको छ।
