भारतको बिहार राज्यमा हुने दोश्रो चरणको विधानसभा चुनावलाई मध्यनजर गर्दै रौतहट जिल्लास्थित नेपाल–भारत सीमा नाका अस्थायी रूपमा बन्द हुने भएको छ।
जिल्ला प्रशासन कार्यालय रौतहटले शुक्रबार सूचना जारी गर्दै कात्तिक २२ गते साँझ ६ बजेदेखि २५ गते साँझ ६ बजेसम्म सबै सीमा नाका बन्द रहने जनाएको हो।
रौतहटका प्रमुख जिल्ला अधिकारी दिनेश सागर भुसालका अनुसार बिहारको सितामढी र पूर्वी चम्पारण जिल्लामा कात्तिक २५ गते चुनाव हुने भएकाले शान्ति सुरक्षाको दृष्टिले नाका बन्द गर्ने निर्णय गरिएको हो। उनका अनुसार आकस्मिक सेवाबाहेक सबै प्रकारको आवागमन पूर्ण रूपमा रोकिँदैछ।
नेपाल–भारतबीचको सुरक्षा समन्वय बैठकपछि दुवै देशका सुरक्षाकर्मीहरू सीमा क्षेत्रमा तैनाथ गरिएका छन्। प्रहरीले सीमा क्षेत्रमा निगरानी बढाएको र निर्वाचन अवधिभर अवाञ्छित गतिविधि रोक्न कडा सुरक्षा सतर्कता अपनाइएको जनाएको छ।
