देशभर उल्लेखनीय मौसमी प्रणाली सक्रिय नभएकाले आजको मौसम सामान्य रहने मौसम पूर्वानुमान महाशाखाले जनाएको छ। महाशाखाका अनुसार उच्च पहाडी तथा हिमाली क्षेत्रमा आंशिक बदली देखिएको छ भने तराईका केही भूभाग, विशेषगरी लुम्बिनी प्रदेशतिर हुस्सु र तुवाँलो कायम छ। बाँकी अधिकांश भूभागमा मौसम सफा रहने अनुमान गरिएको छ।
महाशाखाले दिउँसो कोशी प्रदेशका पहाडी–हिमाली क्षेत्रमा आंशिक बदली रहिरहने र देशका अन्य भागमा खुला मौसम रहने जनाएको छ। राति पनि देशभर मौसम स्थिर रहने महाशाखाको पूर्वानुमान छ।
उपत्यकाको तापक्रम भने क्रमशः घट्दै जाने संकेत देखिएको छ। आज बिहान ५:४५ बजे काठमाडौँ उपत्यकामा मापन गरिएको न्यूनतम तापक्रम ७.४ डिग्री सेल्सियस रहेको महाशाखाले जनाएको छ। सोमबारको ९ डिग्रीको तुलनामा तापक्रम तीव्ररूपमा झरेपछि चिसो बढ्न थालेको स्पष्ट देखिएको छ।
मौसमविद्हरूले बिहान–बेलुकीको चिसोबाट जोगिन आवश्यक सतर्कता अपनाउन समेत आग्रह गरेका छन्।
