राष्ट्रिय स्वतन्त्र पार्टी (रास्वपा) ले सातै प्रदेशका इन्चार्जहरूलाई जिम्मेवारीबाट हटाउने निर्णय गर्दै संगठन पुनर्संरचना प्रक्रियालाई अघि बढाएको छ। सोमबार बसेको सचिवालय बैठकले पुराना इन्चार्जहरूलाई आगामी निर्वाचनमुखी काममा सहभागी गराउने र प्रदेश नेतृत्व अब केन्द्रीय सदस्यहरूले सम्हाल्ने निर्णय गरेको महामन्त्री कविन्द्र बुर्लाकोटीले जानकारी दिए।
यसअघि कोशीमा सन्तोष परियार, मधेशमा मनीष झा, बागमतीमा लिमा अधिकारी, गण्डकीमा शिशिर खनाल, लुम्बिनीमा विपिन आचार्य, कर्णालीमा गणेश पराजुली र सुदूरपश्चिममा हरि ढकाल प्रदेश इन्चार्जका रूपमा रहेका थिए। कोशी प्रदेशका इन्चार्ज परियारले भने यसैबीच पार्टी छाडिसकेका छन्।
बैठकमा विभिन्न राजनीतिक दल, समूह र व्यक्तिहरूसँग भइरहेको संवादको प्रगतिबारे उच्च संवाद समितिले ब्रिफिङ गरेको थियो। सम्भावित राजनीतिक ध्रुवीकरण र सहकार्यलाई परिणामसम्म पुर्याउन सचिवालयले आवश्यक सहजीकरण गर्ने पनि निर्णय भएको बुर्लाकोटीले बताए।
सचिवालयले सुशासन र द्रुत विकासप्रति प्रतिबद्ध सबै वैकल्पिक शक्तिहरूलाई एकै ध्रुवमा उभिन आह्वान गर्दै देशको अर्थ–राजनीतिक संरचनामा आमूल परिवर्तन गर्न सामूहिक शक्ति आवश्यक भएको निष्कर्ष निकालेको छ।
यसबाहेक पार्टीको केन्द्रीय अनुशासन आयोग, केन्द्रीय निर्वाचन आयोग र लेखा आयोगमा रिक्त रहेका पदहरू भर्न केन्द्रीय समिति सदस्यहरूबाट योग्य नाम सिफारिस माग गर्ने निर्णय भएको छ। साथै, देशभरका सबै स्थानीय तहमा ‘र्यापिड एक्सन टिम’ गठन गर्ने तयारी अघि बढाइएको छ।
कार्यसम्पादन मूल्याङ्कन प्रतिवेदनको आधारमा रास्वपा विधानको धारा ७० बमोजिम कीर्तिपुर नगर समिति विघटन गरिएको जानकारी पनि पार्टीले दिएको छ।
