जेन–जी आन्दोलनका क्रममा सर्वोच्च अदालतमा आगजनी गराएको आरोपमा नेपाल ल क्याम्पसका पूर्व स्ववियू सभापति तथा पूर्वमाओवादी नेताको रूपमा चिनिने विष्णु ढुंगेललाई प्रहरीले पक्राउ गरेको छ।
प्रहरीका अनुसार, सर्वोच्च अदालतमा आगो लगाउन निर्देशन दिएको आरोपमा ढुंगेललाई काठमाडौं उपत्यका अपराध अनुसन्धान कार्यालय, टेकु टोलीले नियन्त्रणमा लिएको हो। यसअघि पनि सोही कार्यालयले सर्वोच्च अदालतमा आगजनी तथा तोडफोड गर्ने दुई युवकलाई पक्राउ गरिसकेको थियो।
पक्राउ पर्नेमा झापाको भद्रपुर–१ का २८ वर्षीय ज्योति थापा घताने र ललितपुर, महालक्ष्मीस्थान–५ का ३० वर्षीय सुशील श्रेष्ठ (ब्राउन) थिए। प्रारम्भिक बयानका क्रममा ती युवकहरूले अरूको उक्साहटमा घटनास्थल पुगेको बताएका थिए।
प्रहरी स्रोतका अनुसार, घटनापूर्व र घटनापछि ढुंगेल र ती युवकबीच सम्पर्क रहेको प्रमाण पाएपछि उनलाई पक्राउ गरिएको हो। घटनापछि ढुंगेल लामो समय सार्वजनिक सम्पर्क बाहिर रहेका थिए।
पक्राउसँगै अनुसन्धान अझ गहिरो बनाउने तयारी भइरहेको र दोषीलाई कानुनी दायरामा ल्याउने प्रयास तीव्र भएको प्रहरीले जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
