नेकपा एमालेका नेता महेश बस्नेतले जेन–जी आन्दोलनको छानबिन गर्न गठन गरिएको गौरीबहादुर कार्की नेतृत्वको उच्चस्तरीय छानबिन आयोगलाई आफ्नो पार्टीले मान्दैन भनी स्पष्ट पारेका छन्।
बुधबार धनगढी विमानस्थलमा सञ्चारकर्मीहरूसँग कुरा गर्दै बस्नेतले आयोग निष्पक्ष नभएको भन्दै एमालेका कुनै पनि नेता बयानका लागि जान नहुने बताए। उनले भने, “त्यो आयोग न्यायिक निकाय होइन, पूर्वाग्रह राखेर बनाइएको प्रतिशोधको हतियार मात्र हो। हामी यस्तो आयोगलाई स्वीकार गर्दैनौं।”
महेश बस्नेतले आयोगले जबर्जस्ती एमाले अध्यक्ष केपी शर्मा ओली र अन्य शीर्ष नेताहरूलाई बयानका लागि बोलाउने प्रयास गरेमा, नेताहरू त्यहाँ पुग्नुभन्दा पहिले लाखौं कार्यकर्ताले सिंहदरबार घेर्ने चेतावनीसमेत दिएका छन्।
उनले वर्तमान सरकारलाई सुशासनको नाममा स्टन्ट गरिरहेको, विरोधीहरूलाई सिध्याउन राज्य संयन्त्रको दुरुपयोग गरेको आरोप लगाउँदै आयोगको निष्पक्षतामा प्रश्न उठाएका छन्।
एमालेको यस स्पष्ट अस्वीकारले आगामी छानबिन प्रक्रिया र राजनीतिक तनाव थप बढाउने संकेत गरेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
