स्वास्थ्य तथा जनसंख्या मन्त्रालयले अत्यधिक चिसो बढेकाले अनावश्यक रूपमा बाहिर ननिस्कन सर्वसाधारणलाई अनुरोध गरेको छ । विशेषगरी बालबालिका, गर्भवती महिला, वृद्धवृद्धा र दीर्घ रोगीहरू चिसोको जोखिममा बढी पर्ने भएकाले विशेष सावधानी अपनाउन मन्त्रालयले जनाएको छ ।
मन्त्रालयले जारी गरेको विज्ञप्तिमा जाडोयाममा शीतलहर, हुस्सु, कुहिरो र हिमपातका कारण जनस्वास्थ्यमा प्रतिकूल असर पर्ने उल्लेख छ । चिसोका कारण रुघा, खोकी, ज्वरो, दम बढ्ने, सास फेर्न गाह्रो हुने र हाइपोथर्मियाका बिरामी बढ्ने गरेको मन्त्रालयको भनाइ छ ।
चिसोबाट जोगिन धुवाँ–धुलोबाट बच्न, न्यानो लुगा लगाउन, पोषणयुक्त सन्तुलित खाना खान, भिटामिन–सीयुक्त फलफूल र सागपात सेवन गर्न तथा सरसफाइमा ध्यान दिन मन्त्रालयले आग्रह गरेको छ । साथै प्रशस्त मात्रामा झोल पदार्थ खान पनि सुझाव दिइएको छ ।
मन्त्रालयका अनुसार पछिल्ला वर्षहरूमा जाडोयामसँगै बढ्ने वायु प्रदूषणले मुटु, फोक्सो र मस्तिष्कमा गम्भीर असर पार्नुका साथै दम र क्यान्सरजस्ता दीर्घ रोगको जोखिम बढाउने गरेको छ ।
चिसोका कारण स्वास्थ्य समस्या देखिएमा ढिला नगरी नजिकको स्वास्थ्य संस्थामा सम्पर्क गर्न मन्त्रालयले अनुरोध गरेको छ । साथै आगो र ताप्ने उपकरण सुरक्षित स्थानमा मात्र प्रयोग गर्न, प्रयोगपछि निभाउन, ज्वलनशील सामग्री टाढा राख्न र गिजर बाथरुम बाहिर जडान गर्नसमेत आग्रह गरिएको छ ।
