शेरबहादुर देउवा बुधबार राति सिंगापुर प्रस्थान गरेका छन्। नेपाली कांग्रेसका पूर्वसभापति देउवा राति करिब ११ः३० बजे सिंगापुर एयरलाइन्सको विमानमार्फत त्यसतर्फ लागेका हुन्।
आम निर्वाचन आउन एक साता मात्र बाँकी रहेको बेला देउवा एक्लै सिंगापुर गएका छन्। यसअघि पनि उनी स्वास्थ्य उपचारका लागि पटक–पटक सिंगापुर जाने गरेका थिए। ३१ जेठ २०८० मा पनि उनी उपचारकै लागि सिंगापुर गएका थिए।
देउवाको सचिवालयका अनुसार केही वर्षअघि पेटसम्बन्धी समस्या देखिएपछि उनले सिंगापुरमा उपचार गराएका थिए। चिकित्सकको सल्लाहअनुसार दुई–दुई वर्षमा नियमित ‘फलोअप’ गर्नुपर्ने भए पनि व्यस्त राजनीतिक तालिकाका कारण यसपटक तीन वर्षपछि मात्रै फलोअपका लागि गएका हुन्।
प्रधानमन्त्री भएका बेला विभिन्न तहका निर्वाचन र पार्टीको महाधिवेशनका कारण नियमित स्वास्थ्य परीक्षण हुन नसकेको सचिवालयले जनाएको छ।
यसपटक देउवा एक्लै सिंगापुर गएका छन्। उनकी पत्नी आरजु राणा देउवा भने केही दिनदेखि भारतको तीर्थयात्रामा छिन्। उनी सहयोगीहरूसहित भारतका विभिन्न मन्दिरमा पूजाआजा गरिरहेकी छन्।
पछिल्लो समय पार्टीको दोस्रो विशेष महाधिवेशनपछि देउवा सक्रिय राजनीतिमा कम देखिएका थिए। चुनाव नजिकिँदै गर्दा उनको सिंगापुर यात्रा सार्वजनिक चासोको विषय बनेको छ।
देउवालाई बिदाइ गर्न उनका स्वकीय सचिव भानु देउवालगायत त्रिभुवन अन्तर्राष्ट्रिय विमानस्थल पुगेका थिए। सचिवालयले स्वास्थ्य परीक्षणकै सिलसिलामा सिंगापुर गएको जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
