संयुक्त राज्य अमेरिकाको सेना प्रशान्त कमाण्डका उपकमाण्डिङ जनरल लेफ्टिनेन्ट जनरल जोएल “जेबी” भोवेल तीनदिने भ्रमणका लागि आइतबार काठमाडौं आउने भएका छन्।
फागुन २१ को निर्वाचनपछि नेपाल भ्रमणमा आउने उनी अमेरिकी सेनाका सबैभन्दा वरिष्ठ जनरल हुने बताइएको छ।
नेपाल सेनाका अनुसार भोवेल भुटान हुँदै काठमाडौं आइपुग्ने कार्यक्रम रहेको छ। भ्रमणका क्रममा उनले काभ्रेको पाँचखालस्थित वीरेन्द्र शान्ति कार्य तालिम केन्द्रको पनि अवलोकन गर्ने अपेक्षा गरिएको छ। उक्त केन्द्रमा संयुक्त राष्ट्रसंघको शान्ति स्थापनामा खटिने नेपाली तथा अन्तर्राष्ट्रिय सैनिकहरूलाई पूर्वतयारी तालिम दिइन्छ।
भ्रमणका क्रममा उनले नेपाली सेनाका प्रमुखसहित अन्य वरिष्ठ सैनिक अधिकारीहरूसँग पनि भेटवार्ता गर्न सक्ने जनाइएको छ।
नेपाल भ्रमणअघि मार्च १२ मा जनरल भोवेलले भारतमा भारतीय सेनाका प्रमुख उपेन्द्र द्विवेदीसँग भेटवार्ता गरेका थिए। उक्त भेटमा भारत–अमेरिका रक्षा साझेदारी तथा इन्डो–प्रशान्त क्षेत्रमा क्षेत्रीय सुरक्षा सहकार्य सुदृढ गर्ने विषयमा छलफल भएको बताइएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
