पूर्वप्रधानमन्त्री तथा नेकपा (एमाले) का अध्यक्ष केपी शर्मा ओली र पूर्वगृहमन्त्री तथा नेपाली कांग्रेसका नेता रमेश लेखकलाई आज काठमाडौँ जिल्ला अदालतमा उपस्थित गराइने भएको छ। दुवै जनालाई म्याद थपका लागि अदालत लैजाने तयारी गरिएको हो।

शनिबार बिहान पक्राउ परेका उनीहरूलाई गत भदौमा भएको ‘जेनजी’ आन्दोलनका क्रममा भएको हिंसात्मक घटनासँग जोडिएको आरोपमा नियन्त्रणमा लिइएको हो। उक्त आन्दोलनका क्रममा भएको मानवीय तथा भौतिक क्षतिको छानबिन गर्न गठित गौरीबहादुर कार्की नेतृत्वको आयोगले उनीहरूलाई दोषी ठहर गरेको थियो। त्यसपछि बालेन्द्र शाह नेतृत्वको सरकारको पहिलो मन्त्रिपरिषद् बैठकले सो प्रतिवेदन कार्यान्वयन गर्ने निर्णय गरेको थियो।

प्रहरीले जरुरी पक्राउ पुर्जी देखाएपछि ओली शनिबार बिहान आफ्नै सवारी साधनमार्फत प्रहरी परिसर पुगेका थिए। पक्राउबारे उनले यसलाई राज्यको प्रतिशोधको रूपमा टिप्पणी गरेका छन्।

प्रहरी प्रवक्ता अविनारायण काफ्लेका अनुसार ओलीलाई चिकित्सकको सल्लाहअनुसार त्रिवि शिक्षण अस्पतालमा राखिएको छ भने लेखकलाई महाराजगञ्जस्थित दुई नम्बर गणमा राखिएको छ। उनीहरूमाथि मुलुकी अपराध संहिताअनुसार ज्यानसम्बन्धी कसुरअन्तर्गत लापरबाही तथा हेलचेक्र्याइँ गरी ज्यान मारेको अभियोगमा अनुसन्धान भइरहेको छ।

नवनियुक्त गृहमन्त्री सुधन गुरुङले सामाजिक सञ्जालमार्फत यस पक्राउलाई प्रतिशोध नभई न्यायको सुरुवात भएको बताएका छन्। उनले कानुनभन्दा माथि कोही नहुने र ‘जेनजी’ आन्दोलनका सहिदप्रति न्याय हुने दाबी गरेका छन्।

उता नेकपा (एमाले) ले भने आफ्ना अध्यक्षको पक्राउलाई ‘नियोजित र निर्देशित’ भन्दै आपत्ति जनाएको छ र तत्काल रिहाइको माग गरेको छ।