कृषि तथा पशुपक्षी विकासमन्त्री गीता चौधरीले वर्षे धान रोपाइँका लागि आवश्यक पर्ने रासायनिक मलको अभाव नहुने बताएकी छन्। उनले हालको मौज्दात रोपाइँसम्मका लागि पर्याप्त रहेको स्पष्ट पारेकी हुन्।

शुक्रबार सिंहदरबारमा बसेको राष्ट्रिय सभा अन्तर्गतको संघीयता सबलीकरण तथा राष्ट्रिय सरोकार समितिको बैठकमा बोल्दै मन्त्री चौधरीले सरकारले मल आपूर्तिलाई उच्च प्राथमिकतामा राखेको जानकारी दिइन्। उनका अनुसार रोपाइँपछि आवश्यक पर्ने मल व्यवस्थापनका लागि पनि तयारी भइरहेको छ।

मन्त्री चौधरीले रासायनिक मलसँगै माटोको स्वास्थ्य सुधारमा पनि सरकारले ध्यान दिएको बताइन्। उनले जैविक तथा प्राङ्गारिक मलको प्रयोगलाई प्रोत्साहन गर्ने नीति अघि बढाइएको उल्लेख गरिन्।

सरकारले ल्याएको ‘सय बुँदे सुदृढीकरण’ योजनामा मल व्यवस्थापन र माटो सुधारका कार्यक्रम समावेश गरिएको उनले जानकारी दिइन्। ‘सोयल हेल्थ कार्ड’मार्फत माटोको गुणस्तर सुधार गर्ने योजना पनि कार्यान्वयनतर्फ अघि बढाइएको उनको भनाइ छ।

त्यस्तै, किसानलाई उपलब्ध गराइने अनुदान र बीउबिजन व्यवस्थापनलाई व्यवस्थित बनाउन सरकारले अध्ययन गरिरहेको मन्त्री चौधरीले बताइन्। विगतका कमजोरी सुधार गर्दै वास्तविक किसानसम्म सुविधा पुर्‍याउने लक्ष्य राखिएको उनले स्पष्ट पारिन्।

उन्नत बीउबिजनको सहज आपूर्तिका लागि मन्त्रालयले आवश्यक समन्वय गरिरहेको समेत उनले जानकारी दिइन्।